Saturday, November 11, 2017

Nagpabistong NPA pinadakop ni Mayor Abarrientos sa entrapment


NAGA CITY 11/11/17 (Bicol Standard) -- Narata sa kamot kan mga miembros kan Del Gallego PNP an lalaking nagpabisto na miembro kan New People’s Army (NPA) sa entrapment operation na ginibo kasubagong alas 10:00 nin aga sa Regalado Avenue, Fairview, Quezon City.

Sabi kan pulis dinakop ninda si Alejandro Concepcion y Avila, 27 anyos, taga Barangay Commonwealth, Quezon City, huli kan reclamo ni Mayor Lydia Abarrientos y Borral, 62, kan Barangay Sinuknipan 1, Del Gallego, Camarines Sur.

Segun ki Mayor Abarrientos si Concepcion na nagpabistong NPA pirang beses na naghagad saiya nin cuarta para sa mga rebelde.

Para madali na maihatod sa suboot NPA an cuartang hinahagad, ipig text kan suspechado an numero kan Smart Padala sa saiyang victima, na may instruksyon na maghulog tulos nin kantidad P5,000.00.

Huli kan bagay na ini, isinumbong ni Mayor Abarrientos an incidente sa pulis kan saindang banwaan, kaya naglansar nin entrapment operation.

Pakalihis nin pirang minutos na pagbantay kan mga pulis sa lugar na papadarahan kan cuarta, nacierto na ninda na an suspechadong si Concepcion, iyo an naghahalat kan kantidad, sa Regalado Avenue, Fairview, Quezon City.

Kan marecibe na niya an cuarta hale sa Smart Padala, dinulok na siya kan mga pulis asin inarestar.

Sinabi ni Mayor Abarrientos na pigplano ninda an entrapment kan suspechado tanganing madakop an persona na nagpapara patakot saiya na kun dai magtao kan hinahagad na kantidad, may mangyayaring daing data sa buhay kan alkalde.

Sasangatan tulos nin caso criminal an suspechado.

Mientrastanto, pig-aaram pa kan mga pulis kun totoo mananggad na miembro kan NPA si Concepcion.
Share:

Featured Post

Naga City shabu dealer slapped with life term

NAGA CITY 11/22/17 (Bicol Standard) -- A man caught selling Php200,000.00 worth of shabu inside a room of Villa Caceres Hotel in 2015 w...