Friday, November 17, 2017

Gov Bichara: Punduhon an STL sa Albay



LEGAZPI CITY 11/17/17 (Bicol Standard)—Gustong hagadon ni Albay Gov. Al Francis Bichara ki Presidente Rodrigo Duterte na pondohon an operasyon kan Small Town Lottery (STL) sa saindang provincia.

An desisyon na ini ibinulgar kan gobernador sa press conference huli kan incidente nin baradilan sa atubangan kan Ayala Mall digdi.

Makusog an pagtubod na binadil kan sarong aldaw si Alex Herman Alemania kan mga suspechadong sinda Marlon Magsino asin Michael Malveda nin huli sa iriwal kan mga gustong magpadalagan kan sinambit na sugal.

Si Magsino asin Malveda pareyong dayo sa Albay hale sa provincia kan Batangas.

Maroromdoman na kan sarong hapon, mantang nasa may Ayala Mall digdi, na binadil suboot kan magkaibahan na sinda Magsino asin Malveda an piglulunadan na van ni Alex Herman.

Huli kaini, nagsapo nin tama nin bala si Herman pati an saiyang kaibahan na 24 anyos na babae na si Querobin Anne Marie Lagman.

Sabi kan pulis na nagresponde sa krimen, nabadil kan saindang mga tawohan si Magsino na tulos nagadan sa pinangyarihan kan incidente.

An kaibahan ni Malveda may tama nin bala sa lawas pero dai napurohan. Pig pigbubulong siya ngonian sa Bicol Regional Training and Teaching Hospital sa Daraga, Albay.

Naheling kan pulis na may mga tattoo sinda sa lawas na pareyo an retrato, kaya pigtutubodan na miembro sinda nin criminal gang.

Siring man, may nakua pang suboot na aguimat, o anting-anting, na gustong pa-asiron kuta, pero dai napakinabangan kan badilon kan pulis.

Mientrastanto, pig coconsiderar kan pulis na solved na ninda an casong ini.


Reclamo ni Bichara

An pagtubod ni Gov. Bichara na nagdulot sana an STL nin kariribokan asin krimen sa Albay, kaya desidido na siyang hagadon na papondohon an operasyo kaini.

Sabi sa report, P70 M an dapat remittance kan STL sa Philippine Charity Sweepstakes Office (PCSO) sa bulan-bulan na operasyon sa Albay.

Alagad, an Albay igwa sana nin nakukuang P18,000.00 kada bulan, hale digdi.

Mientrastanto, an mga banwaan kan Albay an nagrereclamo na man dahil na diiton na porcientong nakukua ninda.

Hastang sinusurat an baretang ini dai pa nagpapaluwas nin pahayag an local na Opisina kan PCSO digdi.

May nagbungkaras na informasyon na dinadaya kan operator kan STL an gobierno, sa paagui kan paggamit nin duwang libro de benta kan saindang mga transaction.

An sarong libro iyo itong ipinapaheling sa PCSO, mantang an saro iyo an listahan kan saindang tago na operasyon na pighahalean kan suboot payola, sa nagkapirang mga napapaboran na mga tawo.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...