Thursday, November 16, 2017

3 magturogang nahulog sa salog; ama nakasalvar


MERCEDES, CNorte 11/16/17 (BICOL STANDARD) – Saro pa sana sa tulong aki na inatong sa salog kan Mercedes, Camarines Norte an nasapod ngonian na aga kan mga miembros kan rescue/retrieval team na compuesto kan mga tawohan kan MDRRMO, Coast Guard, Maritime asin PNP sa banwaan na ini.

Sa entrevista kan Bicol Standard, sinabi ni Jude Hernandez, pamayo kan MDRRMO, na an tulong mga aki, iyo sinda Jasmine, 9 anyos, John Adrian, 6 anyos asin si Jommel, 4 anyos.

Base sa informasyon, an tulong mga menor de edad kaiba kan saindang ama na si Jerry Sierra, hale sa banwaan kan Daet.

Papuli na sinda sa saindang harong sa Barangay Manguisoc, kan maaraman ni Jerry na dai na ninda kayang i-ogsod an saindang sakayan ta barado na sa guilid.

Huli kaini, nag desidir si Jerry na maglakaw na sana sinda, mahagidhid sa salog para makapuli sa barangay.

Confirmado an bareta na si Jerry Sierra naka-inom.

Mantang naglalakaw sa guilid kan salog, nahulog sa tubig an mag-arama.

An tulong mga aki dinara kan makusog na sulog, asin hasta ngonian saro pa sana sa sainda an nakukua, na mayo na nin buhay.

Nagprobar pa man kuta an ama na isalvar an saiyang mga aki.

Alagad dai na kinaya ta inatong na kan sulog.

Mientrastanto, nahimo pa kan magurang na maka langoy pasiring sa pangpang kan salog, asin yaon ngonian nagpapaomay sa hospital.

Ipinahayag ni Hernandez na ipapadagos ninda ngonian na hapon an rescue asin retrieval operation sa mahiwas na parte kan salog, para makua an duwa pang aki na nawawara.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...