Tuesday, October 10, 2017

Mga pekeng dentista, pinatanidan


NAGA CITY 10/10/17 (Bicol Standard) -- All-out war an ipiglansar kan Dental Practitioners Association of the Philippines tanganing darakopon an mga nag sasagin-sagin na mga dentist na mayo nin magkakanigong licencia na mag practice kan nasambit na profession.

Si Dr. Jess Albeus nagsabi na aktibo ngonian an Committee on Illegal Practice na pinapamayohan kan saindang national President na si Dr. Mark Villalobos, asin an mga co-chairmen iyo sinda Dean Ariel Go asin an Bicolanong dentista na si Albeus.

Digdi sa Naga City, an sinambit na organisasyon nagpapusog nin coordinasyon sa National Bureau of Investigation, para maglansar nin serye nin operasyon, contra sa mga imbuelto sa illegal practice kan dental profession.

Maromduman na kan nagtalikod na semana, nagkaigwa nin entrapment operation sa Calabanga, Camarines Sur, asin nadakop an unlicensed na dentist na si Nunilon Juliia Pante Olbes, na taga Canaman, Camarines Sur.

Si Olbes pirang beses na suboot na pinatanidan na ontokon na an pag sagin-sagin bilang dentista, ta mayo siyang licencia sa PRC.

Si Olbes, sabi ni Dr. Albeus, nag gagamit kan dental clinic ni Dr. Jerson Verdejo, asin nag gigibo nin dental procedures, na bawal sa lindong kan ley, ta bako man siyang dentist.

Naaraman sa report na an kagsadire kan dental office na saiyang ginagamit haloy nang nag tatrabaho sa luwas kan Pilipinas.

Mientrastanto, pakatapos na tukloon kan NBI kaiba an PDA, sinangatan nin caso sa Provincial Prosecutor’s Office.

An pigbalga ni Olbes iyo an RA 9484 (Philippine Dental Act of 2007) particulamente an pag bulong nin mga dental patients na mayo nin Professional Regulations Commission Certificate of Registration.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...