Wednesday, October 11, 2017

Ex-mayor, ex-vice mayor kan Camarines Sur, akusado sa Sandiganbayan

Constantino "Onyo" Cordial

MANILA 10/11/17/ BICOL STANDARD)- Si Constantino “Onyo” Cordial, Jr., dating alkalde kan Caramoan, Camarines Sur nag-aatubang nin dagdag pang kaso criminal sa pagpalsipicar nin duwang resolusyon kan Sangguniang Bayan na gustong haleon an environmental task force sa banwaan na ini.

An kasong Falsification of Public Documents na kinakastigo sa lindong kan Article 171 kan Revised Penal Code an isinangat na sa Sandiganbayan.

Kabale sa mga akusado sa kasong ini iyo si dating Vice Mayor Irene Breis asin an dating Secretaryo kan Sangguniang Bayan na si Danilo Belleza.

Segun sa informasyon, ipigsunad na kan Ombudsman sa Sandiganbayan an kasong ini kan Oktubre 3.

Sabi sa kaso, pigpalsipicar kan mga akusado an Resolution No. 48, Series of 2014 asin Resolution No. 48-A.

Hinahagad sa mga pigpalsipikar na resolusyon kan Sangguniang Bayan kan Caramoan ki dating Presidente Benigno Aquino III asin ki dating Interior and Local Government Secretary Mar Roxas na mag sugo na haleon tulos an Task Force Sagip Kalikasan sa banwaan kan Caramoan, Camarines Sur.

Mientrastanto, sinabi ni Ismaela Boco, na iyo an graft investigation and prosecution officer na gustong paluwason ninda Cordial, Breis asin Belleza na an duwang resolution inaprobaran kan gabos na miembros kan Sangguniang Bayan.

Alagad, an katotohanan, tulo sa mga consejal an ausente durante kan deliberasyon asin sa borotohan kan Marso 24, 2014.

Idinagdag pa kan Ombudsman na an mga respondents gustong paluwason na an mga consejal kan banwaan na iyo sinda Eduardo Bonita, Lydia Obias asin Francis Benemerito nagparticipar sa deliberasyon asin botorohan kan resolusyon, na dai man talaga.

Si Bonita asin Obias asin saro pang consejal, si Romeo Marto, an nakatalaan na magtestigo contra ki Cordial.

An Ombudsman nagrecommendar sa Sandiganbayan na si an mga akusado magbugtak nin fianzang kantidad P48,000.00 kada saro.

Si Onyo Cordial iyo an agom ni Marilyn Cordial, an presenteng alkalde kan Caramoan.

Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...