1 gadan, 4 irido sa makangirhat na krimen sa Sorsogon

LEGAZPI CITY 10/9/17 (BICOL STANDARD) –Dai pa nabibisto an ngaran kan mga lalaki na imbuelto sa makangirhat na pag gadan ki Maximo Haspela sa Sitio Omagom, Barangay Gulang-Gulang, Irosin, Sorsogon kasubagong mag-omagahon.

Segun ki Police Senior Inspector Malu Calubaquib, Public Information Officer kan PNP sa Bicol, tinadtad nin bala an victima, na binawian tulos nin buhay sa pinangyarihan kan krimen.

Apat na iba pang personas an may mga lugad sa kapareyong incidente.

An duwa digdi mga victima an menor de edad na nabisto sa pangaran iyo si Aron Polo Haspela, 12 anyos, asin Isabel Haspela, 11 anyos.

An duwang iba pa iyo sinda Meriam Polo Haspela asin Tonton Buenaobra, 30 anyos.

Gabos sinda dinara sa Irosin District Hospital para ipabulong.