Monday, September 25, 2017

Traffic lights sa Naga: inomaw, tinuyaw

Naga City (BICOL STANDARD file photo)

ni Joe Caguimbal

NAGA CITY 9/25/17 (Bicol Standard)--Dawa na ngani pigtutuyaw asin padagos na nag-aani nin negatibong reaksyon an mga traffic light sa Naga, nagtutubod si Sangguniang Panlungsod Public Safety and Order Committee Chairman Konsehal Lito Del Rosario na kaipuhan ini sa ciudad nin Naga huli ta parte suboot ini kan progreso.

Dapat na matuod an mga motorista sa Naga kan traffic light ta bakong gabos na panahon yaon an mga miembros kan PSO para magmando kan trafico.

Lalo na kun mauran, dapat traffic light an gamiton, sabi ni Del Rosario.

Maroromdoman na kaining mga nakandaging aldaw sundo sa mga panahong ini dakul an nababaldi na mga motorista na nag-aagi sa Bagumbayan Sur, Peñafrancia asin Balatas ta kun ginagamit an traffic light mas minagurubot an bulos kan trafico sa mga nasambit nang lugar dawa tapos na an kafiestahan igdi sa Naga.

Pero an simbag igdi ni Konsehal Del Rosario, yaun pa an fiesta atmosphere, dakul pa an nagpapasiring sa Basilica kaya halaba pa an traffic.

Pagkatapos daa nin mga duwang simana mawawara na daa yan.

Mientrastanto, sabi kan sarung engineer asin negosyanteng nakaulay kan Bicol Standard na habu nang magpasambit kan saiyang pangaran, saen daa na anggulo malaog an sinasabing progreso o pag-asenso, kun naaabala an mga tawo.

Kun mahuri an sarung empleyado o empleyada sa trabaho huli sa trafico, may pag-asenso daw? Kun an sarung negosyante mahuri sa saiyang appointment, yaun saen daa an progreso?

Dai minakomporme an traffic light sa kalabaan kan Magsaysay, Peñafrancia asin Bagumbayan ta hayakpit an tinampo sa mga nasambit nang lugar, sabi pa kan dai na nagpabistong engineer.
Share:

Featured Post

Albay PENRO arrested in drug bust

LEGAZPI CITY 10/19/2017 (Bicol Standard) – The Chief of the Provincial Environment and Natural Resources Office (PENRO) of the Departm...