Thursday, September 14, 2017

Para sira tinadtad nin bala kan dai nabistong mga lalaki sa Masbate



PLACER, Masbate 9/14/17 (BICOL STANDARD) Tinadtad nin bala an lawas ni Amado Flores, 32, para sira, asin residente kan Barangay Libtong, Cataingan, Masbate kan mga dai nabistong mga armadong lalaki, sa Barangay Pasiagon, sa banwaan na ini.

An incidente nangyari kasubagong alas 5:30 nin hapon.

Sabi sa imbestigasyon, si Flores nagpipisar nin sira, kan may magdulok na duwang dai bistong mga lalaki.

Hinapot ngona an victima kun ano an saiyang pangaran, dangan kan maseguro na siya si Amado Flores, dai nagsayang nin panahon an mga lalaki, pinurokputokan tulos siya kan mga darang badil.

Nagburulagting tulos si Flores sa saiyang kinakamugtakan, huli sa mga bala na nagralagbas sa saiyang lawas.

An mga imbestigador nakakua nin 14ng capsula sa pinangyarihan kan crimen, gabos hale sa calibre .45 asin sarong ilog nin bala.

Nagpapadagos pa ngonian an pagsiyasat kan krimen na ini.
Share:

Featured Post

Bicol Standard at 25 years hits 21 million views

NAGA CITY (Bicol Standard) – Bicol Standard, the region’s most read and fastest-growing news source, is celebrating its 25th anniversar...