Magtarabangan kita: Arts, Culture, and Tourism Office

ni Joe Caguimbal

NAGA CITY--"Tama na an kompetisyon sa lado nin turismo, tama na an kurumparahan kun siisay an mas dakul na turista an nagdadayu, panahon na para matarabangan asin magkasararo para pausbungon an turismo kan tulong ciudad sa Bicol."

Ini an pahayag ni Arts & Culture Tourism Office Head Alec Santos kan makaulay kan Bicol Standard.

An Tri-City Circuit Tourism, sarong programang magkakasararu an mga ciudad kan Naga, Iriga asin Legazpi para magriribayan nin ideya tangaring mag-usbong an turismo sa lambang ciudad.

Segun ki Santos, nakatalaan na bago magtapos an taon 2017 mapag-uulayan an nasambit nang programa kan tulong alkalde na sinda Mayor John Bongat, Madelaine Alfelor asin Noel Rosal tangaring paglaog kan taon 2018 may mga programa naman na iiimplementar tangaring dakul na mga turista an mabirisita sa nasambit nang mga ciudad.

Tinawan duon ni Santos na dakula an nagiging kapakinabangan kan turismo huli ta igdi nakasalalay an imahe kan sarung lugar o ciudad tangaring dakul na mga turista an magdayu o magbisita na nagdadara man nin engreso baku lang sa gobyerno lokal kundi pati naman sa mga pribadong negosyante.