Monday, September 18, 2017

LABO : Nawawarang lalaki nakuang malipot nang bangkay



LABO, CNorte 9/18/17 (BICOL STANDARD) Nakuang malipot nang bangkay an lawas ni Alexander Mapusao, 54, taga P-1, Barangay Malangcao, Basud, Labo, na nalamos sa salog kan nasambit na barangay.

An bangkay kan victima nakua kasuodmang alas 6:00 nin aga (Sept 18).

Segun sa declarasyon ni Punong Barangay Michael Rigodon, nagbalyo sa salog an victima kasabay kan duwa niyang ataman na carabao, kan Sabado (Sept 16).

An sabi sa imbestigasyon, dai pig lalaoman, na an saro kan saiyang ataman na carabao an nagbwelta sa ibong na pang-pang kan salog, kaya pig probaran niyang lamagon ini.

Sa dai piglalaoman na panghayari, nalamos an victima.

Dai tulos nakua an saiyang hawak kaya pig tarabangan na pighanap kan mga taga Barangay Malangcao Basud katuwang an Municipal Disaster Risk and Reduction Management Office (MDRRMO) sa laog nin haros duwang aldaw.

Kan madukayan an saiyang lamos na lawas, naheling na igwa nin mga lugad, na pwedeng sinuag kan damulag, na iyong naging rason kan saiyang pagka lamos.

Hinagad kan mga miembros kan saiyang familya na magkaigwa nin autopsy sa saiyang bangkay para maaraman an tunay na rason kan saiyang pagkagadan.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...