Saturday, August 12, 2017

NPA, inako an ambush sa Viga, Catanduanes



VIRAC, Catanduanes (BICOL STANDARD) –Inako kan Nerissa San Juan Command kan New People’s Army (NPA) an responsiblidad sa pag gadan kan duwang pulis sa ambush na nangyari sa Viga, Catanduanes.

Sa saindang ipinadarang informasyon nag lansar sinda kan operasyon bilang pag responde sa “all out war” kan Duterte administration kontra sa grupo kan mga rebelde.

Nagadan sa ambush iyo si PO1 Eva Torcilino asin PO3 Joseph Tupue na pareyong miembro kan Viga Police.

Afuera kan mga nagadan, tinamaan pa nin bala si Sr. Insp. Ernesto Montes Jr., saiyang likod.

May kaiba sindang duwang drug surrenderees na pareyo nairido.

An ambush nangyari sa Barangay Sagrada, alas 12:30 nin odto.

Sabi sa pahayag kan pulis an enot na napeligrohan iyo an duwang police vans na na nalagarto kan Improvided Explosive Devise (IED) na puminutok sa dalan na inaagihan kan vehiculo kan pulis.

An lunad kan duwang vans iyo an 10ng supechado sa illegal na droga na dadarahon kuta sa banwaan kan Vitac.

An masunod na atake kan NPA nangyari poco mas o menos ala 1:40 nin hapon.

Carculado kan mga nakaheling na dai makulang sa 20ng armadong rebelde an naghipa sa grupo ni Sr. Insp. Montes sa Sitio Pinarayan.

Nagkaigwa nin grabeng baradilan na nagdurar nin pirang minutos.

Base sa ipinadarang text message kan NPA mantang nag aatras an saindang grupo naka-encuentro ninda an mga pulis.

Digdi nagadan sinda Torcilino asin Tupue, na pareyong naporohan nin bala hale sa mga rebelde.

Afuera sa duwang binawian nin buhay nakua kan NPA an 2ng M16 na ripple, sarong gloc .9mm asin iba pang mga gamit kan pulis.

Sabi kan mga rebelde imbuelto an pulis sa Viga, Catanduanes sa illegal na pagpalod nin kahoy na ginagamit sa pagpagibo nin harong.

Mientrastanto, pig condinar kan liderato kan PNP an patraydor na gibo kan mga NPA.

Nagsabi an pulis na apisar kan nagsapo na nin mga mortal na tama nin bala an duwang awtoridad, pinaseguro pa ini kan mga rebelde na putokan sa saindang payo asin lawas para mayo nang buhayan.
Share:

Featured Post

Albay PENRO arrested in drug bust

LEGAZPI CITY 10/19/2017 (Bicol Standard) – The Chief of the Provincial Environment and Natural Resources Office (PENRO) of the Departm...