Monday, July 3, 2017

Iwal sa pulitika sa Pili, orog na nag-init

Kua ni Oscar Esmenda/BICOL STANDARD

PILI, Camarines Sur 7/3/17 (Bicol Standard) – Nahulog na sa political propaganda an bakbakan ngonian sa banwaan kan Pili, Camarines entre kan lado ni Mayor Tomas Bongalonta Jr., asin grupo ni Acting Mayor Nong Regondola na suportado kan mayoriyang miembros kan Sangguniang Bayan. Kadamay digdi si dating alcalde Nonoy San Luis, na maski bako nang mayor, rugado pa sa taboga.

Si Bongalonta na pinatawan nin 2ng bulan na preventive suspension ni Gov. Migz Villafuerte, sa recommendadyon kan Sangguniang Panlalawigan, suportado kan dai makulang sa cien mil na mga sigidores, sa pag lakaw pasiring sa atubangan kan Municipal Hall, tanganing i-denunciar an liderato ni Regondola.

An birada ni Bongalonta, kaya siya pig crusadahan kan saiyang mga kalaban sa politika, ta nagbungkalan niya an dakulang anomaliya kan dating alkalde na si Nonoy San Luis sa pag laog sa contrata sa computerization, na imbuelto an kantidad P13.5 milyon, na ramog-ramog daa nin anomaliya.

An fundo na ginamit digdi inutang sa Land Bank of the Philippines.

Kabale sa sinasahotan ni Bongalonta na nanginabang nin husto iyo si mga consejal kan banwaan na kakampi ni San Luis, na mayoriya incumbent pa guiraray sa panahon na ini.

Kabale digdi si Acting Mayor Regondola.

Preventive suspension

Mientrastanto, maroromdoman na an preventive suspension ki Bongalonta, mapadapit sa reklamong pag-abuso sa poder, kan numbrahan niya an sarong consejal kan barangay, na maging job order na empleado kan Pili.

An trabaho kan barangay kagawad iyo pagiging bodyguard asin alalay ni Bongalonta.

An complainant contra ki Bongalonta iyo si Punong barangay Yolanda Berina kan New San Roque, Pili.

Kasubagong aga, labing sangribo na mga segidores nin Bongalonta, kadaklan nagtrabahong mga job orders, na suboot dai natawan kan saindang sweldo, huli sa diringkilan kan saindang mga oficial.

An drama sa Capital town, nagpapadagos pa guiraray.

Sa parte kan PNP, ipinahayag ninda na “maximum tolerance” an saindang directiba, basta mayong mangyaring kariribokan.

Tinawan nin awad-awad na panahon an mga nag-tataboga na kakampi ni Bongalonta na magbitbit nin mga placards asin mag denunciar kan grupo ni Acting Mayor Regondola, ta ini parte kan saindang derecho sa lindong kan constitution, sabi kan pulis.

Trankilo man an nangyaring actibidad kan Bongalonta group kasubagong aga.


Share:

Featured Post

Naga City shabu dealer slapped with life term

NAGA CITY 11/22/17 (Bicol Standard) -- A man caught selling Php200,000.00 worth of shabu inside a room of Villa Caceres Hotel in 2015 w...