Sunday, July 9, 2017

Babae na nag-salisi, dinakop nin maestra sa Naga City


NAGA CITY 7/9/17 (Bicol Standard) -- Sarong babaeng nag-sagin-sagin na parahatod nin eskwela sa Del Rosario Elementary School sa Barangay Del Rosario, Naga City an ipigreklamo nin pag probar na maghabon sa maestra kan nasambit na eskwelahan.

Si Mercy Pineda y Balasta, 43, taga Barangay Sta. Misericordia, Sto. Domingo, Albay, tinarabangan na dakopon kan saiyang hakboton asin idinulag an shoulder bag ni Maria Teresa Torrena-Cillano, na maestra sa sinambit na elementary school.

Sabi sa declarasyon sa pulis, an suspechadong si Pineda naglaog sa cuarto kan maestra, naki-estoryahan pa, asin nagpabistong guardian nin sarong escuela.

Mantang sibot an teacher sa pag-preparar sa laog kan classroom, nagtaid saiya an suspechado sa lamesa.

Pirang minutos sana an naka-agi, tinakma na tulos kan babae si shoulder bag kan teacher asin dagos si dulag paluwas sa cuarto.

Huli kan pangyayari, linamag siya kan maestra sagkod na nakahagad nin tabang sa sarong driver nin jeep na pampasahero, na iyong naka-tringka sa parahabon.

Maray ngani na nadakop an suspechado.

An mga laog kan shoulder bag na irinabas kan suspechado iyo an minasunod: 1 unit nin tablet na kantidad P8,000.00; digital camara na P5,000.00 an kantidad; sarong ATM card asin mga importanteng documento.

Binitbit kan mga awtoridad sa hepatura kan pulis an suspechado tanganing sangatan nin kaso.

Mientras na pighahanda an caso, ilinaog ngona si Pineda sa female custodial facility sa hepatura kan pulis.
Share:

Featured Post

VG Pimentel lobbies for CNorte hospital upgrade

Camarines Norte Provincial Hospital Photo via https://www.facebook.com/pages/Camarines-Norte-Provincial-Hospital/216874988337215 DAE...