Friday, June 23, 2017

Soldados hale sa Masbate ipapadara sa Mindanao


NAGA CITY 6/23/17 (Bicol Standard) -- Mapadara nin dagdag na sarong battalion na soldados hale sa Bicol duman sa Marawi City, kun magpapadagos an guerra sa Marawi City.

Iyo ini an pigconfirmar kasuodma ni Capt. Randy Llunar, hefe kan Division of Public Affairs Office, 9th Division, PA sa mga miembros kan media.

Pig-aadalan an posibilidad na an mga miembros kan Army na distino sa Masbate, sa 2nd Infantry Battalion an i-susulong sa guerra, segun pa ki Capt. Llunar.

An 2nd IB an napili na ipadara sa Marawi City ta bago pa sana sinda matapos kan saindang refresher training.

Mientrastanto, pinara ni Llunar an pagduda asin paghadit kan iba, ta dai makulang an mga soldados sa Bicol maski pa magpadara nin dugang na fuerza sa Mindanao.

Sa kapareyong declarasyon, sinabi kan army na dakul pa an matatada sa Bicol na mga miembros kan army na masustinir kan laban kan gobierno sa mga rebelde, orog na sa islang provincia kan Masbate.

Carculadong 500 na soldados hale sa Masbate an pig eestira na dadarahon sa Marawi City.

Enot kaini, an army sa Bicol nagparada na sa Mindanao kan mga soldados na miembros kan 42ndIB, 49th IB asin 65th IB.
Share:

Featured Post

Naga City shabu dealer slapped with life term

NAGA CITY 11/22/17 (Bicol Standard) -- A man caught selling Php200,000.00 worth of shabu inside a room of Villa Caceres Hotel in 2015 w...