Wednesday, June 14, 2017

‘Mamimiss ko kayo’ – Sr. Supt Munez


NAGA CITY 6/14/17 (Bicol Standard) -- “Ma mimiss ko ang lugar na ito.”

Ini an pabalon na mensahe ni Sr. Supt. Julius S. Munez, an hefe kan Naga City Police Office na nag-serve digdi sa laog nin sarong taon.

Si Munez, nabisto na maboot alagad maisog na pulis sa pag-implementar kan ley na sinaludohan asin respetado kan saindang mga pag-iriba asin kan mga oficiales local.

Inako niya sa atubangan kan mga miembros kan media na igwa man nin mga bakong maray na experiencia an saiyang pagtukaw na pamayo kan pulis digdi, pero mas dakul an mga maray asin maogmang mga aldaw.

Itinaong halimbawa niya si mga kadifisilan sa pagpa-otob kan disiplina durante kan naka aging Penafrancia fiesta, na ipinasunod niya an pag-putol kan signal kan mga telcos, na sa primero nag-ani nin negatibong reaksyon.

Idinagdag ni Munez na huli kan namantinir na trankilidad sa bilog na panahon kan sarong bulan na aktibidades na may relasyon sa Penafrancia fiesta, inomaw man guiraray an ginibo kan pulis.

“Kung ang tanong n’yo ano an mga maaalala ko rito, ang sagot ko ay – ang sili ice cream, mabait at magaling makisamang mga tao,” sabi ni Munez.

Base sa record kan mga naging hepe kan pulis sa Naga City, si Munez an solamenteng naging hepe kan NCPO na nagkaigwa nin permanent status, ta nakua niya an bendisyon asin suporta ni Mayor John Bongat asin mga miembros kan City Council.

Mientrastanto, antes na maghale digdi, itinugon niya sa mga pag-iriba na handa na an security plan para sa Penafrancia fiesta, na saiyang pig lapigotan na mabilog an blueprint kaini.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...