Wednesday, June 28, 2017

6 na department heads kan Albay, rinibayan



LEGAZPI CITY —Nagpahayag nin pagkadisganar si Bokal Rolly Rosal kan ika duwang disrtrito kan Albay sa disisyon ni Gov. Al Francis Bichara na ribayan sa pwesto an anom (6) na pamayo nin departamento sa Provincia kan Albay.

Sinabi ni Rosal sa saiyang privilege speech na dai inotob ni Bichara an tamang proceso sa pagribay kan mga department heads afuera pa kan mayo nin itinaong rason kun nata ta sinda rinibayan.

Segun sa informante kan Bicol Standard, an mga hinaklas sa saindang pwesto iyo an mga pamayo kan Officina kan Provincial Health Office; Provincial Social Welfare Officer; Provincial Sports Office; Provincial Assessor ; Provincial Environment and Natural Resources Office asin Provincial Human Resource Management Office.

Idinagdag kan bokal na an mga hinale sa pwestong mga official kan provincial may okupadong posisyon sa plantilla, kaya dai sinda pwedeng basta na sanang ribayan, na mayo nin magkakanigong rason.

Ipinaliwanag ni Rosal na an mga hinale na mga pamayo kan mga officina provincial pig numbrahan kan gobernador pagkatapos na sernehon an saindang papeles kan selection board asin oyonan kan Sangguniang Panlalawigan.

Kun tinawan man sindang ibang trabaho, bako suboot na kapareyo kan saindang dating posisyon, mantang an iba, mayo nin itinaong trabaho para saiya.

Mientrastanto, an kasimbagan sa akusasyon ni Bokal Rosal, sinabi ni Danny Garcia, an parataram kan officina kan gobernador na “performance” an rason kun nata ta hinale sinda sa pwesto.

Sabi ni Garcia dai man sinda hinale bilang empleado, kundi tinawan sana nin bagong trabaho na mas angay sa sainda.

An obheto suboot ni Gob. Bichara para man sana sa mga constituentes kan provincia na nagkakaipo nin mas efffectibong servicio hale sa gobierno.
Share:

Featured Post

VG Pimentel lobbies for CNorte hospital upgrade

Camarines Norte Provincial Hospital Photo via https://www.facebook.com/pages/Camarines-Norte-Provincial-Hospital/216874988337215 DAE...