Improvised explosive device, nagsabog sa Goa, Cam Sur

GOA, Camarines Sur 5/30/17 (Bicol Standard) -- Sarong truck kan mga miembro kan Philippine Army an tinamaan kan magsabog an sarong improvised explosive device (IED) sa Barangay Pinaglabanan sa banwaan na ini poco mas o menos alas 5:30 nin aga kasoodma (Mayo 29).

Nakasakay sa military truck an mga miembro kan Alta Company kan 3rd Infantry Batallion na nakabase sa Barangay Hiwacloy sa banwaan na ini, na pabalik na kuta hale sa 83rd Infantry Batallion sa Mabalodbalod, Tigaon, Camarines Sur.

Segun sa Goa Municipal Police Station, nagtutubod sinda na mga lokal na terrorista an nagtanom kan nasambit na IED, na gibo sa apat na pedasong double A na pila asin sarong rolyo nin electrical wire.

Dinagdag pa kan Goa MPS na mayo man nin nakulgan sa nasambit na pagsabog.