Wednesday, May 3, 2017

EDITORIAL | STL asin jai alai


Kun dai nareparo kan iba, kan naka-aging Sabado, (Abril 29) may suboot tawohan kan Small Town Lottery (STL) an binadil sa San Pedro, Iriga City.

An saiyang ngaran Jojo Gredo.

Minutos sana an nag-agi, kuriyat na an noticia na tinira si Gredo nin huli kan iriwal sa jai alai asin STL sa Camarines Sur.

An problema lang kaya kun maghapot ka kun sa mga awtoridad kun baga legal o ilegal asin STL asin jai alai, mayo nin toltol na nakukuang paliwanag.

An jai alai na pinapadalagan kan Meridien Vista Gaming Corporation nagsasabi na awtorisado sinda kan Cagayan Economic Zone Authority (CEZA). Entonses, legal daa an saindang operasyon.

An Philippine Charity Sweepstakes Office (PCSO), na iyo mismo an nagtaong permiso sa Small Town Lottery, nagsabi na an STL iyo sana an legal an operasyon.

Si Bicol Chief Supt. Omar Buenafe nagsabi pareyo sinda may ipinapaheling na mga documento na nagsasabi na legal sinda. Kaya, mahalat sana an pulis kan mga masunod na instruction mapadapit digdi.

Ribong na lugod an mga tawo kun arin an totoo.

Huli kan siring na sitwasyon, binadil si Gredo kan STL huli sa nangyayaring competensya sa negosyong ini sa Iriga City.

Nag langkaba nang entero ngonian an paghadit na may masuronod pang mangyayaring violencia, na pwedeng mas makangirhat an kaabtan.

May mabulos pang dugo kun magpapadagos na dai ini maresolveran.

Sarong empleado kan jai alai an nagsabi na nagkakalakaga talaga an sitwasyon sa Iriga City.

Orog nang sa lugar na ini an may pinakadakul na engreso hale sa mga parataya.

Sa oro-aldaw na pagbola, omok-omok nin delehensya an nagpapasugal.

Kun may magbutwa na karibal sa negosyo, na arog kan STL, seguradong madurulak an mga tawohan kan mga mapadalagan kan operasyon.

Pirang semana pa lang pag entra kan STL digdi sa Iriga City preparado na an taga jai alai na ipaki laban an saindang hanap buhay. Maski pa an karibay an saindang buhay.

Sa parte kan STL, an pagtubod kan saindang mga tawohan yaon sa sinda an bendisyon kan ley. Segurado na may dakula sindang cuarta na makukua, na pwede ilaban nin gadanan.

Kaya, bakong harayo na mangyari an makahadit na sitwasyon.

Tindido an PCSO na an STL an mag derechong magpasugal.

An jai alai siring man.

Sa panahon na ini, malinaw nang nagbubungkaras an madagom na senyal na magkakariribok asin maturo an dugo kun an sitwasyon na ini dai tulos maagapan.

An isyu legalidad asin kriminal.
Share:

SPECIAL OFFER

SPECIAL OFFER

Featured Post

Sorsogon mayor, 2 others charged in Sandiganbayan

SORSOGON CITY 5/23/17 (Bicol Standard) -- Ombudsman Conchita Carpio-Morales has recommended the filing of criminal charges against Bu...