Sunday, April 16, 2017

Mahabas nin pambulang na manok, nadakop sa Sorsogon


BULAN, Sorsogon 4/16/17 (BICOL STANDARD) –Makuri an pagbasol kan 35 anyos na driver na nabisto sa pangaran na Richie Miten y More, taga Sitio Laya, Barangay Gate sa banwaan na ini kan madakop siya sa akto na suboot naghahabas nin pambulang na manok.

Segun sa pulis, si Miten ginodgod pasiring sa presinto ni Jesus Gidoc, an kagsadire kan color “sarab” na pambulang na manok, sa tabang ninda barangay kagawad Alfredo Golpo asin barangay secretary Lorenzana Abayon.

An nakamangno kan paghabas kan pambulang si Michael Gidoc, aki kan kagsadire kan pambulang.

Segun ki Michael nagimata siya kan mag-arokaak an ataman nindang “sarab,” asin makadangog nin mga kamas-kamas sa may kulungan.

Nagbungkaras siya (Michael) para reparohon an ataman. An saiyang naheling iyo an mga parahabas.

Binukod niya an mga lalaki, alagad dimalas na si Miten sana an saiyang nadakop. Si duwang kasapakat, nakadurulag, lunad sa motorsiklo.

An “sarab” pig kondisyon na kutang pambulang ngonian na semana sana.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...