Friday, April 21, 2017

Mag-agom na Avenido nalalangob sa Tinangis Penal Farm


NAGA CITY 4/21/17 (Bicol Standard) Dinara na kasoodma sa Tinangis Penal Farm an mag-agom na Nestor asin Maria Joy Avenido, an duwa sa mga nanginginot na akusado sa mga casong syndicated estafa na inbuelto an labing P200 millyones hale sa sari-saring clase nin tawo digdi asin sa iba pang lugar kan nasyon.

Sinabi ni Police Chief Inspector Ronnie Fabia, an hefe kan Criminal Investigation and Detection Group (CIDG) sa Camarines Sur, na nagdudugang pa an numero kan mga nag-rereklamo kontra sa may agom.

Enot kaini, 47ng mga caso nin estafa ipig-serve sainda. Alagad, kasoodma, nadugangan pa ini nin 19 asin madudugangan pa, sabi sa report.

Afuera sa mag-agom na Avenido, kabale man bilang mga respondents sa caso iyo an saindang mga aki na sinda Angel Jones, Anthony Jones, Andrew Jones asin Angelica Jones Avenido.

An mga miembros kan familia Avenido, kabale sa corporasyon na saindang pig-organisar tanganing padalaganon an multi-milyon na investment company, na nakasapog sa nasambit na escandalo.

An mga caso kontra sa familia Avenido dadangogon kan 3ng sala kan Regional Trial Court sa Naga City asin Pili, Camarines Sur.

Afuera kan mga casong syndicated estafa, an mag-agom, akusado man sa sarong sala kan Municipal Trial Court digdi, sa mga casong pagbalga sa B.P. 22, an Bouncing Check Law.

Mientrastanto, naaraman kan BICOL STANDARD na may nagdulok pang nagkapirang mga tawo sa National Bureau of Investigation na masangat pa nin caso kontra sa mga akusado.

Pig lalaoman na sa maabot na mga aldaw, orog pang madakul an numero kan mga complainants na an iba mga retiradong pulis, mga paratukdo, retiradong empleado kan gobierno, OFW asin maging mga nakatukaw na juwes, na nag-invirtir man nin darakulang kantidad nin cuarta sa lending company kan familya Avenido.

Igwa man nin mga haralangkaw na opisyal kan gobierno provincial kan Camarines Sur an naka-ayon pa sa halawigon na listahan kan mga nag-tiwala nin darakulang kantidad sa lending business kan mag agom.
Share:

Featured Post

Albay PENRO arrested in drug bust

LEGAZPI CITY 10/19/2017 (Bicol Standard) – The Chief of the Provincial Environment and Natural Resources Office (PENRO) of the Departm...