Friday, March 10, 2017

Pusikit na drug pusher sa Virac, dakop


VIRAC, Catanduanes 3/10/17 (Bicol Standard)  Sampulong sachets nin shabu an nakua kan pulis kan saindang ipig implementar an Search Warrant sa sinasahotan na drug pusher digdi na nabisto sa pangaran na Maximo Rabida na taga Sitio Luminanggas, kan Brgy. Danicop sa banwaan na ini.

An operasyon kan pulis pinamayohan ni PCI James Ronatay, an hefe kan pulis digdi.

Enot pa kaini, si Rabida dati nang nadakop kan mga awtoridad sa pagbalga kan ley sa ilegal na droga, kan taon 2015.

Nin huli kan pagbungkaras liwat kan maigot na operasyon kan pulis kontra sa ilegal na droga, nabuhay an mga positibong reaksyon kan mga namamanwaan na nag-susuporta kan programa kan administrasyon ni Pres. Duterte.

Si dating Gob Araceli Wong kan Catanduanes nagpahayag sa Facebook na siya nagngangalas ta igwa pa guiraray nin nagpapabakal asin naggagamit kan illegal na droga.

Pinuntariya pa kan dating gobernador na siya nasorpresa ta may mga namamayo nin lokal na gobierno sa islang provincia an nasasahotan na igwang pagkaaram kaini.

Inalok pa ni Wong an mga tawo na kaipohan nang makipagtabangan sa gobierno, dai matakot asin an mga imbuelto dapat talagang manimbag. (May report hale ki Ramil D. Soliveres)
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...