Tuesday, March 14, 2017

Pulis nagsagin-sagin na NPA, tiklo sa entrapment


NAGA CITY (Bicol Standard)— Pighahanda na an mga kaso na isasangat kontra ki PO2 Gilbert San Juan Embestro, an pulis na nakadistino sa banwaan kan Pamplona, Camarines Sur na nadakop sa ciudad na ini sa entrapment operation huli paghagad nin cuarta sa saiyang mga biktima.

Nagluluwas sa mga reports na si Embestro nagpapabisto na miembro kan NPA tanganing magkadugas nin cuarta sa saiyang mga naging biktima.

Base sa intrevista ki P/Insp. Greg Bascuna, hefe kan pulis sa Pamplona, si Embestro miembro kan intelligence group kan pulis.

“Dai ko lamang pighuna na igwa siya nin mga illegal na gibo, mala ngani ta pigtitiwalaan pa siya bilang miembro kan intel,” sabi ni Bascuna.

Nagpahayag na si Bascuna na dai niya tutogotan na dai panimbagon si Embestro sa mga asunto na saiyang dapat atubangon, orog nang maigot sinda ngonian sa paglinig kan raot na miembros kan saindang organisasyon.

Maroromdoman na nahulog an suspechado sa kamot kan mga awtoridad digdi, pagkatapos na masusog an saiyang mga gira dapit sa pangongotong, asin pagpabisto na siya NPA.

Susog sa record kan pulis, afuera kan nabiktima digdi, igwa man nin report na may arog na man siya kaining kaso sa mga banwaan kan Buhi asin Pamplona, Camarines Sur.
Share:

SPECIAL OFFER

SPECIAL OFFER

Featured Post

DAET GARBAGE ISSUE | Sarion blames Ochoa; Ochoa to request for state audit of funds

Former Mayor Tito Sarion (left), incumbent Mayor Benito Ochoa (right) DAET, Camarines Norte—“The ball is now in the hands of the new ...