Sunday, March 5, 2017

Nagholdup sa Paracale, nabadil kan pulis


PARACALE, Camarines Norte 03/05/17 (Bicol Standard) – Nabadil sa hita an lalaki na nagholdup sa Candelaria Street, Brgy. Poblacion Norte sa banwaan na ini na nagtumang sa mga awtoridad.

An victima kan pagholdup iyo an Malayan Store na sadire ni Cecille Lumar y Lamadrid, na negosyante asin residente kan nasambit na lugar.

Nangayi an incidente poco mas o menos alas 8:47nin aga kan Marso 2, mantang nasa laog kan tindahan an kagsadire kan tindahan.

An suspechado, gamit an armas na kutsilyo pirit na naglaog sa tindahan.

Nabisto an suspechado sa pangaran na Wendell Ebona y Tayas, 37, may agom, mayong trabaho, taga Purok Yakal A. Brgy Poblacion Norte digdi.

Pakatapos na magdeklarar nin holdup an suspechado, pirit niyang kinua hale sa kaha kan tindahan an kantidad P2,000.00 na buenamanong benta kan aldaw.

Mientrastanto, nagresponde si PO1 Jason R. Poot, kan Paracale MPS.

Mantang parane an pulis narisa niyang igwa nin armas na kutsilyo an suspechado kaya pighandaan na tulos ini kan awtoridad.

En vez na matiwasay na magsuko sa pulis nagprobar pa lugod na magtumang an suspechado kaya siya binadil sa hita kan pulis.

Nakua hale sa bulsa kan suspechado an 2ng manangribong pesos na hale sa kaha kan tindahan.

Huli kan tama kan suspechado, idinalagan siya sa Paracale Health Center para ipabulong.

Pirang minutos an nakaagi, ibinalyo siya sa Camarines Norte Provincial Hospital para matawan nin atensyon medical.

Sasangatan man guiraray siya nin kasong Robbery kan mga awtoridad.
Share:

Featured Post

Albay PENRO arrested in drug bust

LEGAZPI CITY 10/19/2017 (Bicol Standard) – The Chief of the Provincial Environment and Natural Resources Office (PENRO) of the Departm...