Tuesday, March 7, 2017

Mag-ilusyon, naglaog sa motel, babae nagbadil sa sadire


TABACO CITY 03/07/17 (BICOL STANDARD) –Harorom na imbestigasyon an ginigibo kan pulis sa nangyaring pagkabadil ki Jessa Oliva, dating taga Lagonoy, Camarines Sur, alagad nag-eestar na ngonian sa Brgy. 4, Malilipot, Albay.

Sabi sa record kan pulis kaiba kan victima an saiyang boyfriend na si Dennis Colada y Montallana na taga Santo Cristo sa laog kan room 6 kan Mitos lodge, na namumugtak sa P-3, Brgy. Baranghawon digdi.

Base pa sa report, binadil kan victima an saiyang sadire, asin tinamaan siya sa toong parte kan saiyang tulak kasubagong alas 8:20, ngonian na aga.

Inaragapan an victima asin idinalagan sa hospital digdi.

Alagad, ibinalyo sa Bicol Regional Training and Teaching Hospital (BRTTH) para ipabulong.

Mientastanto, an mga imbestigador nakakua suboot nin badil sa pinangyarihan.

Kasugpon kan baretang ini, nakakua an nag-atendir sa saiyang nurse nin 3ng sachet nin pigtutgubodan na shabu, hale sa bag kan victima.

Kan kapkapan man an kailusyon kan victima na si Colada nakakua an mga awtoridad nin sachet nin marijuana, illegal drug paraphernalia asin cash na kantidad P20,000.00.

Nagpapadagos pa an imbestigasyon kan kasong ini.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...