Friday, March 31, 2017

Lalaki na may lugad sa sentido, nakuang gadan


LEGASPI CITY 3/31/17 (Bicol Standard) Mayo pa nin ikatukdo na suspechado an pulis sa paggadan ki Raphael Del Agua y Brinces, 63 anyos na balo, alagad may kasaroan, na nakuang malipot nang bangkay kasubagong alas 5:30 nin aga sa saindang residencia.

Si Del Agua naka-estar sa P-2, Brgy. Dita digdi.

Segun sa report na ipinaabot sa pulis, nadiskubre an bangkay kan victima kan saiyang kasaroan na si Salvacion Arena, 65 anyos, likod kan harong na saindang pig eestaran.

An bangkay igwa nin lugad sa saiyang sentido.

Idinagdag sa report na ultimong naheling na buhay si Del Agua kan saiyang sobreno na si Jeffrey Del Agua y Malate kan Marso 30, alas 8:30 nin aga, na nakahigda sa lugar na naheling an bangkay.

Mientrastanto, nagsabi an kasaroan na si Salvacion na binayaan niya si Del Agua na solo sa saindang harong, aga, kan fecha 30 kan Marso.

Alagad, kan magbwelta siya sa saindang pig eestaran, alas 5:30 nin aga ngonian na aldaw (Marso 31), gadan na.

Sabi kan mga nagrespondeng mga pulis, hinale na an bangkay kan victima sa original na kinakamugtakan kaini kan mga paryente niya asin ibinugtak sa payag-payag.

Mapadagos pa an pag siyasat kan incidente, sabi sa report.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...