Monday, March 20, 2017

Karambola nin 3ng truck: 1 gadan, 3 irido sa Daraga, Albay

Kua ni Susan Bernal Balane
DARAGA, Albay 3/20/17 (Bicol Standard) – Saro an gadan mantang tulo an irido sa nangyaring aksidente sa tinampo kasubagong alas 4:30 nin aga, sa P-1, Villahermosa sa banwaan na ini.

Nabisto an nagadan na iyo si Jason Macapagal, taga Bolabog, Pilar, Sorsogon.

Nagadan siya sa pinangyarihan kan aksidente.

Base sa report, an imbuelto sa aksidente iyo an duwang 18-wheer na trucks asin an saro 6-wheeler truck.

Sinabi kan imbestigador na an duwang 18-wheeler trucks pasiring sa Sorsogon, mantang an 6-wheeler pasiring sa Poblacion kan banwaan na ini.

Mientras na nagdadalagan an 18-wheeler truck na pig mamaneho ni Alfredo China y Soriano, taga Malasiqui, Pangasinan (plate number ADA 7779), sa Brgy, Villahermosa, nakasabit an kargamento kaining tower crane sa poon nin acacia na nasa guilid kan tinampo.

Huli kaini, nahulog an kargamento sa tinampo asin tinamaan an kasabat na 6-wheeler truck na pig mamaneho ni Jason Macapagal.

Sabi pa sa pagsiyasat, nawaran nin control an driver kan 6-wheeler truck kaya na nakadalagan an vehiculo sa walang parte kan tinampo, kaya nakasalpokan kaini an 18-wheeler truck (plate number CUX 761) na pig mamaneho ni Jery Broce y Cajocson, taga Calamba, Laguna).

Narunot an payo ni Macapagal huli sa kusog kan salpokan kan duwang trucks na sabatan an direksyon.

An ibang mga pahinante nagsapo man nin mga lugad kaya idinalagan sa hospital. Nabisto an saindang mga pangaran na iyo sinda Joco Anes, taga Bacolod City, John Baltazar, taga Bacolod City asin Zaldy Bayonito, taga Tabaco City.

Pig bubolong sinda huli sa mga bakros asin rungas sa lawas.

Mientrastanto, nagluluwas na delinquent talaga sa lugar na pinangyarihan kan aksidente ta nagkapira na an nangyaring disgracia digdi.

An binabasol kan mga drivers iyo an nakakaolang na mga poon nin kahoy na nasa laog kan road right of way na linikawan kan pagpatrabaho sa pagpahiwas kan tinampo.
Share:

Featured Post

VG Pimentel lobbies for CNorte hospital upgrade

Camarines Norte Provincial Hospital Photo via https://www.facebook.com/pages/Camarines-Norte-Provincial-Hospital/216874988337215 DAE...