Friday, March 24, 2017

Isla Sison, linaog kan PDEA; droga, bank book na may P700K deposit nakua

NAGA CITY 3/24/17 (BICOL STANDARD) – Sarabay na pig serve an 5ng search warrants sa 5ng suruway na residencia sa “Isla Sison,” sa Brgy. Penafrancia digdi, na target kan RPDEU 5 sa orog na pinakusog na kampanya kontra sa illegal na droga.


An main operating unit iyo an PNP Regional Drug Enforcement Unit 5, katuwang an Naga City Police Office, PDEA Camarines Sur.

An mga hinaloghog na mga lugar iyo an estaran ninda (1) John Larry Jay Cuanio, na may nakuang 11ng plastic sachet nin shabu. Sa nasambit na lugar, natagboan kan mga awtoridad an minasunod na nasa acto na naggagamit nin illegal na droga an minasunod: (a) Marvin Badilla y Comprado (b) Justin Lacsina y Macalino (c) John Carmelo Cuanio y Macaayong. (2) Remegio Marco Rapal y Miranda; 8ng sachet nin shabu an nakua, (3) Ronnie Santos y Comprado, 9 na sachet an nakua saiya asin Christine Rafor y Comprado alyas Kimba, may nakuang saiyang 11ng sachet nin shabu; weighing scale, drug paraphernalia asin (5) Michael Bien y Comprado alyas Jan-Jan ( at-large, 2ng medium size na shabu.

An nasambit na mga persona haloy nang nasa listahan kan mga pursigidon sa negosyong pagtinda nin shabu.

Afuera kan mga sachet nin shabu, biyong ngalas an mga ahentes kan Philippine Drug Enforcement Agency sa nakua nindang Bank Book na may deposito nin maabot sa P700,000.00 sa residencia ni Christine Rafor.

Si Rafor, 21 anyos pa sana an edad, mayo nin trabaho, afuera kan sahot na paratinda nin droga.

An saiyang ama asin ina pareyong nalalangob na ngonian sa New Bilibid Prison, para servehan an halawig na sentencia sa pagtinda nin shabu.

Laen pa kaini, an matuang tugang ni Rafor yaon man ngonian sa laog kan District Jail kan BJMP, sa Del Rosario digdi. Akusado man siya sa pagiging imbuelto sa illegal na droga.

Mientrastanto, naabotan kan Regional Police Drug Enforcement Unit an kasaroan ni Jay Cuano, nakikimaherak na tabangan darahon sa hospital ta 9 na bulan na bados, asin maaki na ngonian na aldaw.

An saiyang ina, enot na man nadakop sa buy bust operation kan sarong taon.

Sa intrevista kan BICOL STANDARD, ipinahayag ni SPO2 Bongon, na tatabangan kan pulis na madara an bados sa hospital.

Sagkod sa panahon na sinusurat an baretang ini, nagpapadagos an mga tawohan kan PDEA, NCPO, CSPC, asin SWAT sa pag-rekisa kan mga lugar na sakop kan search warrant.

An mga nakuang mga illegal na droga pig iimbentaryo pa sana.

Presente sa ginibong operasyon an mga representantes kan media, Department of Justice asin mga Barangay Officials.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...