Tuesday, March 28, 2017

EDITORIAL | An sagradong pagpili


Mayo na gayod na mas popular na tema ngonian kundi an pig anunciar na pag-oktaba na naman kan election sa barangay.

Magibsaw an mga pabor asin an mga kontra, orog pa.

Sa mga pabor an solamenteng rason iyo na 40% daa kan mga nakatukaw na opisyal kan barangay imbuelto sa ilegal na droga.

Maski mayo pang inaprobaran na ley na talagang an election sa barangay liwat ma-ooktaba, may senyales na desidido si Pres. Duterte asin an saiyang mga pag-iriba sa Congreso na ipirit an planong ini.

An prueba iyo an ipig sunad na House Bill 5359, na an tema para sa pagpostpone kan Barangay asin Sangguniang Kabataan Election sa ika tulong semana kan Oktubre, 2017.

An padrino kan House Bill 5359 iyo si Rep. Ace Barbers na arog ni Pres. Duterte, taga Mindanao man.

Mawot niya na isibog sa Mayo 2020 an election kan mga barangay officials, asin sa kada ika tulong taon.

An propuesto ni Barbers, kun maaprobaran, mangangahologan na an gabos na nakatukaw na opisyales kan barangay tapos na an turno. An presidente daa iyo na an may poder na mag numbra kan mga officers-in-charge sa barangay.

Sa pagtubod ni Barbers kun igwa man nin mga provision sa saiyang bill na minabalga kan Constitution, an mga dai afectado magpapadagos na efectibo pa guiraray.

Alagad, syempre, ini saro sanang parte kan nagluluwas na barangang kaisipan sa issue kan pag-oktaba kan election.

An mga senador na kakampi kan administrasyon nagkaigwa nang pag-orolay asin pigtukar an magabat na issue.

Igwa nin mga nasa administrasyon na nagtutubod na bako ining facil na plano.

Ngonian pa sana, dakul nang mga may kabatiran sa ley an nag-didiskutir kan legalidad, bentahe asin dis-bentahe kan siring na kaisipan.

Halawig pa an discusyon dapit digdi.

An dai dapat malingawan, na sa sarong demokratikong nasyon, arog kan Pilipinas, mas maray na an poder sa pagpili kan saindang mga lider, dapat ipaniwala sa mga elector.

Totoo, naglangkaba na talagang entero an problema sa droga sa nasyon.

Halawig na panahon kayang napabayaan ini kan mga nakaaging administrador.

Iyo, pwedeng bulawan an valor kan kaisipan ni Presidente Duterte sa paglaban sa droga.

Alagad, iyo na sana daw talaga ini an solamenteng paagi?

Kun illegal na droga an problema, gamiton kan gobierno an gabos niyang fuerza. Gamiton an pulis, militar, PDEA, jusgado, asin iba pa.

Pwedeng halion an sisay man na oficial kan barangay basta may magkakanigong causa. Kun 40% talaga na may sala, ano ta dapat kastiguhon an 60% na dai man nin kasalan?

Dai dapat pag agawon sa mga elector an derecho na sagrado para sainda. Sinda an dapat magpili nin lider por medio nin election.

Share:

SPECIAL OFFER

SPECIAL OFFER

Featured Post

Masbate's Villalobos Gang leader falls

MASBATE CITY 8/15/17 (Bicol Standard)--The alleged leader of Villalobos Gang, Ruel Villalobos y Amo, was neutralized in an anti-illegal...