Tuesday, March 7, 2017

EDITORIAL | Maisog na kampanya kontra sa droga


Pakalihis nin labing sarong bulan na pahingalo, nagdecidir an Duterte administration na ibalik an maisog na kampanya kontra sa pagkuriyat kan ilegal na droga.

Ini an naging pusog na tindog kan liderato kan pulis nin huli kan pagbungkaras liwat kan bwelong pagpabakal nin shabu sa mga lugar na dating mercado ninda.

Malinaw an direktiba ni PNP Chief Director General Bato Dela Rosa kun ano an dapat sunodon na reglamento para maibitaran an mayong kamugtakan na garadanan huli ta an victima nasahotan na nagprobar na magtumang sa awtoridad.

An kurahaw kan mga kontra sa Tokhang, makuring pagbalga sa derechos humanos an gawi kan ibang mga abusadong pulis. Afuera pa ini sa patimasang na pag gadan sa mga inaapod na “vigilante killers”, na nagkuriyat sa bilog na nasyon, kasabay kan kampanya kan mga awtoridad kontra sa kriminalidad asin ilegal na droga.

Totoong naglakop an ilegal na droga sa laog nin pirang semanang naghorom an kampanya kan pulis kontra digdi.

Si mga drug addicts bwelo na liwat na naghihiwa-hiwa sa paghanap nin mababakalan nin droga ta mayo man kaya nin nangyaring rehabilitation sainda.

An mga dating “pusher” nagbalik guiraray sa saindang trabaho karibay kan dikit na droga na sa lenguahe ninda – para maka score man lamang.

Maray kutang programa kan gobierno na labanan an bisyong ini.

Alagad kulang talaga an programa kun Tokhang sana. Mayong mabago maski pa oro-aldaw na maglansar an pulis nin mga operasyon para darakopon an mga saradit asin tingi-tingi na paratinda sagkod na igwa pa nin nakukuanan nin bastanteng supply.

An dapat decidiran kan gobierno iyo an pagdakop kan mga darakula na para gibo asin supplier kan droga.

Kaipohan susogon an burabod kan droga asin dapat seryoso an programa sa rehabilitasyon.

Bilang positibong kasimbagan kan administrasyon, sa maabot na Marso 25, igwa nin pagboot an Department of Interior and Local Government (DILG) sa paagui ni Sec. Ismael D. Sueno na an gabos na barangay magkaigwa nin Barangay Assembly Day.

An tema sa asembleya “Sulong Barangay Kontra Droga, Krimen at Katiwalian: Makialam! Makiisa!”

Nagpatanid si Sec. Sueno na an dae mag-otob kan pagboot na ini, igwa nin nakareserbang kastigo.

Pwede sindan plantiaran nin administrative complaint kun dai mag-otob kan ley dapit sa pag conducir nin Barangay Assembly.

An reklamo pwedeng i-sangat kan sisay man na residente kan barangay, concerned citizen, government or non-government entity sa Sangguniang Panlungsod o sa Sangguniang Bayan kan saindang lugar, susug sa Sec. 61 kan Local Government Code, o sa Office of the Ombudsman.

Kun seryoso an gobierno na pohoon an problemang ini, dapat katuwang an mga opisyales kan 42,302 na mga barangay sa bilog na nasyon.

Kaipohan kita gabos sa pagresolver kan problemang ini.
Share:

SPECIAL OFFER

SPECIAL OFFER

Featured Post

Masbate's Villalobos Gang leader falls

MASBATE CITY 8/15/17 (Bicol Standard)--The alleged leader of Villalobos Gang, Ruel Villalobos y Amo, was neutralized in an anti-illegal...