Monday, March 27, 2017

EDITORIAL | Impeachment drama


Kun an hapot may posibilidad daw na magtriumfo an impeachment complaint kontra ki Presidente Rodrigo Duterte, an malinaw an simbag na harayo ini na mangyari ini. Mayo nin bastanteng numero na pwedeng sandigan an mga kalaban kan Duterte administration sa House of Representatives. Seguradong sa basurahan sana madalagan an nasambit na reklamo.

Si Party-list Rep. Gary Alejano asin mga kasurog niya sa kaisipan na ini ciertong dai makakakua nin suporta nin un-tercio (1/3) kan gabos na miembros kan camara de representante.

Kun siring, mga karaw-kasaw sana ini kan oposisyon.

Talagang mayo nin papadumanan an ipigbubusol na impeachment ki Duterte ta sa kapinonan pa sana, mayo man talagang suporta hale sa mga deputado.

Apisar kayan, bakong popular an siring na ideya ngonian na panahon na mahamot pang maray an pangaran kan presidente kan nasyon.

Anas sana ining gibsaw kan menoriya asin kan oposisyon.

Pwedeng tama man sinda ta mala ngani sinda an oposisyon.

Laen pa kaini, dakul an nagtutubod na kaprecho sana kan nagkapirang mga dating imbuelto sa coup d' etat an pagratak kan pangaran kan presidente.

Dai mababasol an mga tawo kun may pagduda sinda sa agenda ni Sen. Antonio Trillanes asin mga pag-iriba sa camarabaha, orog nang si Rep. Gary Alejano an pamato kan grupo ninda.

Sa ibong na lado may pigluluto na impeachment complaint kontra ki Vice President Leni Robredo.

Ini an mas makahadit, orog pang inako ni Speaker Bebot Alvarez na preparado niyang susuportaran an nasambit na ideya.

Kun ano an sinasabi ni Speaker Alvarez na malinaw na legal na basehan, salom na gayod iyan kan mga tawo kun ano an kahulogan.

Seguradong may papadumanan, ta un-tercio man sana o kulang nganing 100 na firma nin mga deputado an hinahagad kan Constitution.

Sa frankang pagtaram malinaw an huma na ini.

Kun tano ta dapat magplantear nin impeachment complaint kontra sa vice presidente, kawasa kaya, kan enot pa, nasasahotan na siya na may pagkaaram sa suboot planong pagparampahog kan Duterte administration. An siring na akusasyon, pirang beses nang pinahimutikan kan vice presidente.

An mamundong paghorophoropon ta an talagang garit-garitan i-reklamo si VP Leni iyo man sana an kapwa niya Bicolano na si Dante Jimenez kan Volunteers Against Crime and Corruption (VACC).

Determinado si Jimenez na patunayan na an vice presidente nagbalga asin naka-komitir nin “impeachable offense.

Aram kan mga Pilipino na an senado kontrolado kan mga kakampi ni Pres. Duterte.

Arog kan nangyaring impeachment trial ki dating Supreme Court Chief Justice Renato Corona, an pig oorolayan digdi kun pira an kakampi sa politika. Mantang igwang dakulang suporta ki Duterte an mga senador, madaling magsumada kan pwedeng maging resulta sa impeachment trial.

Sari-sari an opinion dapit sa bagay na ini.

An mga kakampi ni VP Leni makuri an pagbasol sa mga tawo na nagkakalaban saiya lalo na sa mga kahimanwang Bicolano.

An iba mayong paki aram mantang may mga nag-aatid-atid pa kan sitwasyon.

Kundi, aber pa. Bantayan ta na lang masunod na mga mangyayari.

Hasta ngonian anas pa sana man mga malalanit na mga tataramon na nagpapakala-kaga kan daghankan mga pabor asin kontra.

Maghalat na sana ngona gayod kita kun igwa na talagang reklamo sa camara de representantes na mawot ipa-impeach an vice presidente.

Anas pa sana mga bana-bana.

Actualmente, aram man kan kadaklan, maging politico o bako, na sa issue sa impeachment bako sanang legalidad, technicalidad o ano pang iba.

An procesong ini maliwanag na politika an basehan.
Share:

SPECIAL OFFER

SPECIAL OFFER

Featured Post

Mayor Gaite to file MR

BAAO, Camarines Sur –“ I will not resist if the order of the Ombudsman is served upon me by the Department of Interior and Local Gove...