Wednesday, March 15, 2017

EDITORIAL | An drug adik dai takot sa kagadanan


Kun linupigan si aki o agom mo, minasaker an pamilya mo kan nin drug addict, pwedeng maski pa maybaliog kang rosario o may sulot na krus sa daghan, masabi kang gadanon na tulos siya.

Baranga an opinion kan mga tawo mantang nag-aatid-atin kan desisyon kan Camara baja na kastigohon nin kagadanan an mga imbuelto sa ilegal na droga.

Sa sarong lado, haros mapatod na an ugat sa liog kan ibang mga padi asin mga nagkokontra kan bill sa pagkurahaw na sala, asin mayo sa tawo an poder na magsilot nin kagadanan. Ini nakareserba sana sa Kagurangnan.

Igwa man nin maray na punto an simbahan.

Alagad, an mga pabor sa death penalty igwa man.

Oraging, may sector an naghahapot kun tano ta an mga imbuelto sana sa ilegal drugs an kakastigohon kan siring na padusa?

Hinahanap kan mga pabor sa death penalty na ibale sa mga dapat sentenciahan nin kagadanan an mga nagkasala nin paghabas kan cuarta kan gobierno. Lalo na kun convicted sa casong Plunder.

Mamundo para sa saindang grupong na tuyong pinalasaw an sakop kan death penalty.

Kun an mga convicted sana sa illegal drugs an masapo kan siring na padusa, mayo man lang ining saysay.

Sa oro-aldaw na pagsubaybay asin paghinirib kan mga bareta an mga drug dependents haros mayo na man nin takot sa kagadanan.

Mala, ta maoobserbaran na tumang na ngani sa kagadanan.

Dai takot sa bala. Dai supog na lugosan an sainda tugang, ina, pinsan, mga kaamistad asin iba.

Maski sa paghabon mayo nang pag-alangan ta napara na sa vocabularyo ninda an tataramon na kasusupgan.

Iyan an nagdadanay na katotohanan.

Ano palan an serve kan death penalty kun an mga sugapa sa droga dai ngani hadit o in tumang na sa kagadanan?

Pwedeng adalan na maray an anggulong ini.

Dai takot na magadan an mga drug addicts.

Kaipohan patamaon kan gobierno an programa sa paglaban sa problemang ini.

Importante na igwa nin toltol na programa sa rehabilitasyon kan mga lolong sa droga.

Mas pakusogon an pagdakop kan mga paragibo nin illegal na droga. Total, kun mayong supply, mayo nin mababakalan.

Kun aprobaran kaya kan Senado an bill para sa death penalty, na seguradong pipirmahan tanganing maging ley ni Pres. Duterte, madagdag sana an ilulubong na mga condinado sa illegal na droga.

An problema dai man mareresolveran.

An mga drug addicts dai man takot sa kagadanan.
Share:

SPECIAL OFFER

SPECIAL OFFER

Featured Post

DAET GARBAGE ISSUE | Sarion blames Ochoa; Ochoa to request for state audit of funds

Former Mayor Tito Sarion (left), incumbent Mayor Benito Ochoa (right) DAET, Camarines Norte—“The ball is now in the hands of the new ...