Monday, March 27, 2017

Brgy. kagawad Alanis, 2ng iba pa, dakop naman sa ilegal na droga


IRIGA CITY 3/27/17 (Bicol Standard) – Nasa laog na ngani kan selda kan Bureau of Jail Management and Penology (BJMP) digdi, nakakua pa guiraray nin shabu an pulis hale sa poder ni Brgy. Kagawad Alan Alanis, Oliver Oñedo asin Jobert Ranido sa guinibong Oplan Galugad kan sarong banggui.

Si Alanis, na nalalangob ngonian sa carcel digdi, maroromdoman na nakuanan na dati nin 150 gamos nin shabu na may carculadong valor na labing sarong milyon na pesos.

Makusog an pagtubod kan mga pulis na an nasambit na opisyal kan barangay iyo an saro sa mga dakulang supplier nin droga sa Rinconada Area, kabale digdi an mga pagtaraid na banwaan.

Si P/Supt Alex Pederio, hefe kan pulis sa Iriga City, nagpasabot sa gabos na dai mahuraw an saindang kampanya sa ilegal na droga sagkod na igwa pang mga nanonotaran na nagbabariwas asin naggagamit kaini.

Mientrastanto, afuera ki Alanis, igwa pang nagkapirang mga tao digdi an pigsusubaybayan kan mga pulis huli sa pagduda na dakula an saindang partisipasyon sa pagtinda nin shabu.

An mga nadakop sa Oplan Galugad kakasohan liwat sa pagbalga kan Republic Act 9165, an Comprehensive Dangerous Drugs Act of 2002.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...