Sunday, February 26, 2017

Naghabas pambulang na manok, rinabosan punite kan mga tawo

BICOL STANDARD file photo
DARAGA, Albay 02/26/17 (BICOL STANDARD) – “Kun goroton an ngabil ni Errol Capuz y Aguilar, 29, wara ki dugo sa grabeng nerbyos saka supog ta suboot nadakop siyang naghabas ki pambulang na manok.”

Ini sabi kan barangay tanod kan P-4, Brgy. Gapo, sa banwaan na ini na naghatod ki Capuz sa hepatura kan pulis kasubagong amay na aga.

Sabi sa report an suspechado binorokod kan mga tawo sagkod na madakop siya.

Idinagdag pa sa informasyon na maski nagwawalwal na an dila kan suspechado ta pagal na pagdalagan, kugos pa guiraray niya an pulang pambulang na manok na sadire ni Joel Lopos y Amaranto.

An victima taga P-4 Gapo digdo, mantang an parahabas taga P-1, Brgy. 31, Baybay, Legaspi City.

Kan mag-abot an mga tanod kan nasambit na barangay na bitbit an suspechado, nanotaran kan pulis igwa siya nin bakros asin ludog sa payo.

Suboot, rinabosan siya nin punite kan mga taga barangay na nagbukod tangani siyang madakop.

An nagdara sa hepatura kan pulis iyo an mga tanod kan Brgy. Dinorogan, sa banwaan na ini.

Sasangatan siyang kasong Theft huli kan paghabas kan pambulang na manok.
Share:

Featured Post

Albay PENRO arrested in drug bust

LEGAZPI CITY 10/19/2017 (Bicol Standard) – The Chief of the Provincial Environment and Natural Resources Office (PENRO) of the Departm...