Friday, January 13, 2017

CD Ramos kan Tabaco City, namatos-patos na?

TABACO CITY 13/17 (BICOL STANDARD) – Nag paaram na si PNP SrSupt. Allan Ramos, hefe kan pulis digdi sa saiyang mga tawohan, maski dae pa narerecibe an direktiba na riniribayan siya sa pwesto.


Base sa enot na mga reports, si Ramos pinapangidaman ni Alkalde Krisel Lagman-Luistro, an alkalde kan ciudad na ini.

Mismong si Alcalde Luistro an naghagad sa liderato kan pulis kan Albay na sipaon sa pwesto si Ramos asin ribayan nin official kan pulis na taga Albay.

Nagluluwas sa pahayag ni Ramos na pinapahimutikan kan kan alkalde na pabaya siya sa trabaho, asin parate wara sa saiyang opisina.

Sinahotan pa an hefe kan pulis na pirme na sanang paoli sa saiyang residencia sa Cavite.

Maski suboot kan panahon kan pag agi kan bagyong si Nina, an hefe kan pulis digdi wara man sa saiyang officina.

Mientrastanto, sinabi ni Ramos na sa laog nin 4 na bulan na nadistino siya bilang hefe kan pulis digdi, dae lamang siya nakaoli sa saiyang harong.

An solamenteng inako niya iyo an nagkapirang beses na pagdalaw sa saiyang tugang na nag-eestar sa Daet, Camarines Norte.


Bakong totoo na wara siya sa trabaho pirme

Pig linaw ni Ramos na antes kan pag rapado kan bagyong Nina, yaon siya sa saiyang tukawan.

Maski pakatapos kan calamidad, yaon man guiraray siya nag-aasikaso kan saiyang trabaho bilang hefe kan pulis kan ciudad.

Makulog an boot ni Ramos na personal siyang pig krusadahan ni Mayor Luistro.

Ini apisar na kan aktibo niyang pagtrahano.

Kabale sa ipig tutukdo kan hefe kan pulis iyo si saiyang pagtuyo sa City Disaster Risk and Reduction Management Office kan Tabaco City, tanganing magtabang.

Pig puntariya niya an kakulangan nin mga gamit kan sinambit na officina sa pagsalvar nin tawo asin propiodad.

Malinaw niyang itinataong rason iyo an saiyang presensya antes asin pakatapos kan calamidad sa officina ni Vice Alkalde Nestro San Pablo, na kan panahon na ito iyo an nagtutukaw na Officer –In-Charge, mantang wara si Luistro sa ciudad.

An mga nag-oobserbar sa ciudad nagtutubod na victima si Ramos kan amay na burolyada kan mga pulitiko, bilang preparasyon sa masunod na pirilian.
Share:

SPECIAL OFFER

SPECIAL OFFER

Featured Post

PDIC takes over Goa bank

Rural Bank of Goa Photo: PDIC MANILA— The Monetary Board (MB) of the Bangko Sentral ng Pilipinas (BSP) prohibited Rural Bank of Goa (...