Monday, December 5, 2016

Payroll money, pigholdup sa Sipocot

SIPOCOT, CSur 12/05/16 (Bicol Standard) – Pwedeng mga dating laborers kan HGG Construction an imbuelto sa pagholdup kan saindang payroll money kan Sabado, Diciembre 3, digdi.


Ini an sinabi ni alkalde Ogie Astor, sa intrevista kan BBS DWLV ngonian na aga.

Segun sa alkalde, igwa nin declarasyon an may dara kan cuarta na fuersahan siyang tinutukan nin badil dangan inagaw kan tulong mga badilan na mga joven na lalaki an dara niyang payroll money, na pambayad kuta sa mga trabahador kan construction firm.

Sabi pa ni Astor, nag-aabot sa kantidad P370,000.00 an nalalayay na cuarta kan mga holduppers.

“Nagpaputok pa ngani kan saindang mga badil. Mga araki pang lalaki an nagholdup,” sabi pa kan alkalde.

Marikas sindang nagkutipas padulag, lunad nin motorsiklo an mga suspechado.

Hastang sinusurat an baretang ini nagpapadagos pa an pag-imbestigar kan pinakabagong caso nin pananalakat digdi.

Maroromdoman na an mga pulis nagpatanid sa publiko na maging maingat na maray ngonian na bulan nin Pasko huli sa susug mismo sa saindang experiencia kadakul an mga arog kaining krimen an nangyayari.

Enot kaini, victima nin holdup an sarong gasolinahan sa banwaan kan Pamplona, nagsunod an nangyari sa Libmanan, asin ini an pinaka bago.
Share:

SPECIAL OFFER

SPECIAL OFFER

Featured Post

Masbate's Villalobos Gang leader falls

MASBATE CITY 8/15/17 (Bicol Standard)--The alleged leader of Villalobos Gang, Ruel Villalobos y Amo, was neutralized in an anti-illegal...