Tuesday, December 6, 2016

Concepcion Gang members: 1 gadan, 1 irido, binadil kasubago sa Libon

LIBON, Albay 12/06/16 (Bicol Standard) – Duwang pigtutubodan na miembros kan tinatakutan na Concepcion Gang an binadil kasubagong alas 5:15 nin hapon, sa Brgy. San Agustin, sa banwaan na ini.

An mga victima nabisto sa pangaran na Benjie Garing, na yaon sa watchlist kan mga awtoridad na imbuelto sa paggamit asin pagtinda nin shabu asin si Eugene Berina y Naz.



Si Garing, taga Brgy. Nogpo, binawian tulos nin buhay, mantang si Berina, na taga Brgy. Marayag, may tama nin bala sa saiyang tabay.

Susug sa listahan kan awtoridad iyo na ini an ika 28ng victima kan nagpapadagos na garadan sa banwaan na ini, poon sana kan taon 2013.

An banwaan na ini yaon na ngonian sa higot na pagbantay kan mga miembros kan army asin pulis, huli sa mga enot nang caso nin garadanan na isinasahot sa mga miembros kan Concepcion Gang, na an lider asin mga miembros taga digdi sa banwaan na ini.

Si Gilbert Concepcion, an pamayo kan gang iyo an nanginginot sa listahan kan mga pighahanap kan pulis asin militar sa rason magabat an saindang partisipasyon sa garadanan, harabonan, kabale na an pagbariwas kan ipinapangalad na shabu.

Mientras na sinusurat an baretang ini mayo pang malinaw na motibo kan pinakabagong caso nin paggadan.
Share:

SPECIAL OFFER

SPECIAL OFFER

Featured Post

Masbate's Villalobos Gang leader falls

MASBATE CITY 8/15/17 (Bicol Standard)--The alleged leader of Villalobos Gang, Ruel Villalobos y Amo, was neutralized in an anti-illegal...