Saturday, December 3, 2016

2 estudiante, dinakop sa pagsuba na may dara sindang bomba sa mall

DAET, CNorte 12/02/16 (Bicol Standard) Natakot asin nagrulungsi an duwang menor de edad na estudiante kan Lourdes College kan sinda dakopon kan mga guardia sa Central Plaza Mall, digdi, pagkatapos na magpatakot sinda sa mga tawo na igwa sindang darang bomba.

Segun sa report, naging marigmat an mga guardia sa nasambit na establisimiento, kaya pinatanidan tulos sinda na bawal an arog kaining suba, orog nang may huma sa seguridad sa mga matawong lugar.


An mga estudiante na aapodon sa pangaran na Marife asin Jose (bakong tunay na pangaran) ma- window shopping asin mapasyar sa mall.

Alagad kaibahan sa saindang pagpalipas nin oras an marigsok na suba na pahaditon an mga tawo sa paagi nin pag anunciar na may laog nin bomba an bag na saindang dara.

Mientrastanto, nin huli sa seryong kasubahan na ini, tulos sindang kinomprontar kan namamayo kan security guard sa nasambit na mall, para paisihon na pwede sindang kastigohon nin pagkapreso asin multa.

Sa enot na parte kan pakihampangan kan duwa sa chief security kan mall, pareyo naka ngisi pa an duwa.

Pirang minutos sana kan ipaheling sainda an dakulang poster na nakabugtak sa mall na nagpapatanid sa arog kaining kasubahan, biglang nagtakig an tuhod asin nag-kibigkibig an ngabil kan mga aki.

Huli kan pangyayari, naghagad man tulos nin kapatawadan asin dispensasyon an duwang estudiante sa manehamiento kan nasambit na mall.

An mga joven na estudiante pinalibre man tulos kan guwardia, pakatapos na patanidan na dae na sinda mag gibo kan siring na salang gibo.
Share:

SPECIAL OFFER

SPECIAL OFFER

Featured Post

PDIC takes over Goa bank

Rural Bank of Goa Photo: PDIC MANILA— The Monetary Board (MB) of the Bangko Sentral ng Pilipinas (BSP) prohibited Rural Bank of Goa (...