Sunday, December 18, 2016

Beauty salon sa Daet, sinalakat

DAET, Camarines Norte 12/17/16 (Bicol Standard) Sinalakat nin 2ng dae nabistong mga lalaki an Arly Style Salon, na makukua sa Vinzons Avenue, Brgy V, sa banwaan na ini kasoodmang alas 7:00 nin aga.



Victima kan pagsalakat si Maria Valentina y Alba, 39, may agom, cashier kan salon, asin nag-eerok sa Happy Homes Centro, sa Brgy. Lag-on, digdi.

Sabi kan mga imbestigador, pig-estorya sainda kan victima na kan magbukas siya kan salon, an saro sa duwang suspechado an nagsabi saiya na mapabulog nin buhok.

Alagad, sabi kan victima, mayo pa an saindang hairstylist.

Mientrastanto, kan malaog kuta sa comfort room an victima, an duwang suspechado nagsunod saiya.

Mantang mayo pang ibang tawo sa lugar, pirit na inagaw kan mga parasalakat an saiyang shoulder bag.

Nakilaban an victima, alagad sinuntok siya sa tulak asin ginabring na hastang naagaw an bag na may laog nin cash na kantidad P17,600 asin sarong kulentas na nagkakantidad P14,000.

Hasta sa sinusurat an baretang ini dae pa nabibisto an mga parasalakat.

May ginigibo man ngonian nin follow-up operation an mga pulis para madakop an mga naggibo kan krimen.
Share:

SPECIAL OFFER

SPECIAL OFFER

Featured Post

Chief Supt. Gardiola assumes as Bicol top cop

LEGAZPI CITY 7/10/17 (Bicol Standard)--Police Chief Supt. Antonio N. Gardiola has been installed as the Acting Regional Director of...