Wednesday, November 16, 2016

Nakasakay sa motorsiklo binadil sa Ligao City, saro an gadan

LIGAO CITY November 16, 2016 (Bicol Standard)--Dai nabisto an lalaki na nagbadil kasubagong alas 11:00 nin aga ki Grover Stephen Orogo y Lyco, 31, soltero, taga Brgy. 3 Pioduran, Albay.



Sabi sa report, mantang nagdadalagan sa tinampo an motorsiklo na pigmamaneho ni Erwin Paloyo y Odena, 37, may agom, taga P-1, Brgy. Banawan, Pioduran, basta na sana sindang pinaputokan kan dai nabistong suspechado.

Alagad, an lagartong tinamaan kan bala iyo an nakasuno sa motorsiklo na si Orogo, na binawian tulos nin buhay.

Mientrastanto, an driver kan motorsiklo na si Paloyo, nagsapo nin mga rungas asin bakros sa saiyang tuhod asin hita ta nagsukamang an saiyang vehiculo pasiring sa cale sa guilid kan tinampo.

Idinalagan si Paloyo sa JBDMDH para ipabulong. Alagad, ipiglipat na siya sa Bicol Regional Training and Teaching Hospital (BRTTH) asin duman pigbubulong.

An incidente nangyari sa Brgy. Tinampo digdi.

Hasta ngonian, nagpapadagos pa an imbestigasyon.

Mayo pang malinaw na informasyon kun ano an motibo sa nasambit na krimen.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...