Thursday, November 24, 2016

MALINAO: Tinigbas an amigo, ta inagawan siya nin kanta

MALINAO, Albay 11/24/16 (Bicol Standard) “Kawasa, an sakong mga piniling kanta sa karaoke, inaagaw niya. Siya an minakanta. Pigkomprontar ko siya kun nata ta pigkakanta niya an sakong kanta?”

Retrato hale sa Pixabay
Ini an pahayag ni Joseph Mercado, y Buizon, 28 anyos, na taga Brgy. Comon, digdi, na nakakonkon ngonian sa laog kan detention cell huli sa suboot pagtigbas niya kan kamot asin likod ni Bobby Ceneta.

An sabi ni Mercado, mag-amigo sinda ni Ceneta.

Sa declarasyon ni Mercado, sa okasyon kan kumpleanyo, an kada saro nagpipindot sa karaoke kan numero kan mga kursunadang kanta.

 An problema ta pakatapos na pilion niya an kanta, pirmi siyang ini-enotan ni Ceneta sa pagkanta.

Huli kaini pigcomfrontar ni Mercado si Ceneta kun nata ta ginigibo niya ini.

Nag-oli si Ceneta sa saindang harong. 

Pagbalik kan victima sa birthday party, nag-suspecha si Mercado may darang siyang armas.

Nag-oli man si Mercado. Nagkuang sundang.

Pag-abot niya sa party, tinibtiban tulos ni Mercado an kamot kan victima asin likod.

Segun sa report, idinalagan an victima sa  Ziga Memorial Hospital, sa Tabaco City.

Pero, ibinalyo an victima sa Bicol Regional Teaching and Training Hospital (BRTTH) sa Legazpi City, huli ta hararom asin darakula si mga lugad sa lawas.

Sa ibong na lado, an si Mercado isinuko sa pulis sa paagi ni Eddie Casquejo na miembro kan Brgy. Tanod.
Afuera kan persona ni Mercado, isinuko man si mga awtoridad su tabak na guinamit sa pagtigba kan victima.


An mga pulis nagpapadagos kan saindang imbestigasyon ngonian, asin pighahanda an pagsangat kan magkakanigong asunto kriminal contra sa suspechado.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...