Monday, November 7, 2016

Mag-ama nakuryente sa Minalabac, pareyo binawian nin buhay

MINALABAC, CSur November 7, 2016 (Bicol Standard) – Binawian tulos nin buhay si Jeremy Alpe y Sapusao, 18 anyos, asin an saiyang ama na si Luis Alpe y de los Reyes, 49 anyos, pareyo residentes Sitio Tagudtod, Brgy. San Jose, huli sa pagka-kuryente kan Sabado (November 5).



Segun sa imbestigasyon, an naging causa kan kagadanan kan mag amang Alpe iyo si illegal na koneksyon nin kuryente hale sa residencia ni Isaac Guarnes y Yanto pasiring sa mga residencia ninda Roberto Rambuyong y Balang asin Arturo Oliva y Deguia, sa Brgy. Sagrada, digdi.

Idinagdag sa report na poco mas o menos alas 12:00 kan Sabadong odto, mantang si Luis Alpe asin Sixto Balang Jr y Malate nag eestoryahan, nagabot si saiyang aki na si Jeremy Alpe para maghatod nin pangodtohan.

Sa puntong ini, naheling na sana kan gurang na Alpe na nagkikimig-kimig an saiyang aking si Jeremy, ta nakadoot siya sa wire na igwang kuryente na illegal na nakatakod hale sa residencia ni Isaac Guarnes, pasiring sa harong ninda Roberto Rambuyong asin Arturo Oliva.

Mientrastanto, mantang nagdadalihig an makusog na voltahe kan kuryente sa lawas ni Jeremy, nag agap an saiyang ama. Sinoble kaini an tsinelas ni Sixto Balang asin binognot si wire na pig guikanan kan kuryente na nakadoot sa lawas kan saiyang aki.

Huli kaini, nagdalihig man sa kuryente sa lawas kan gurang na Alpe.

Pareyo sinda binawian nin buhay.

Si Luis Alpe nagtatrabaho bilang pastor nin itik.

Idinagdag sa imbestigasyon na dinara sa hepatura kan pulis sinda Guarnes, Rambuyong asin Oliva para sa nagpapadagos na imbestigasyon.

Pig hahalat pa kan pulis na ma-completo an imbestigasyon antes na mag sangat nin caso sa mga posibleng imbuelto sa nasambit na krimen.
Share:

SPECIAL OFFER

SPECIAL OFFER

Featured Post

Chief Supt. Gardiola assumes as Bicol top cop

LEGAZPI CITY 7/10/17 (Bicol Standard)--Police Chief Supt. Antonio N. Gardiola has been installed as the Acting Regional Director of...