Bicol newspaper | Bicol Standard | Get Bicol news about the Bicol region: Naga City, Camarines Sur, Albay, Legazpi City, Masbate, Sorsogon, Camarines Norte and Catanduanes.

Monday, November 28, 2016

LIBON, ALBAY: Ika-apat na victima kan Concepcion Group, tinumba kasubagong aga

LIBON, ALBAY 11/27/16 ( Bicol Standard) – Si Gilbert Concepcion o an mga pag-iriba niya sa saiyang grupo an ipigtutukdong nasa likod kan serye nin garadanan sa banwaan na ini.


Ini an pigconfirmar na bareta ni PCI Arthur Ramirez Gomez, an parapahayag kan Albay Police Provincial Office (PPO) sa intrevista kan BICOL STANDARD ngonian na aldaw.

Sabi sa report, kasubagong alas 7:30 nin aga, binadil si Anjul David y Argarin, 38 anyos sa Sitio Caratalan, Brgy. Macabuhos, digdi.

An suspechado sa krimen suboot mga miembros kan Concepcion Gang.

Nabisto na saro sa mga suspechado iyo si Jonathan Ropio alias “Alex,” na residente man sana kan Sitio Caratagan, Brgy. Macabuhos, digdi.

Kaibahan ni Ropio an duwa pang mga dai nabistong mga lalaki, na armado nin dai madeterminaran na calibre nin badil.

Pakalihis kan krimen, an mga suspechado nagdurulag.

Mientrastanto, maroromdoman na kan sarong aldaw, tulong miembros kan familia Sandrino an ipigbaretang tinodas man kan mga miembros kan nasambit na grupo.

Ini suboot may relasyon sa nagpapadagos na operasyon kan mga awtoridad tanganing dakupon si Concepcion, na suboot imbuelto sa darakulang krimen.

An mga nasambit na enot nang ginadan kan grupo ni Concepcion iyo si Josephine Sandrino, na taga Brgy. Bonbon, an saiyang agom na si Angel asin an saindang aki na si Benjie.

Si Gilbert Concepcion may patong na kantidad P3.5 M sa sisay man na makakatukdo kan saiyang kinakamugtakan.
Share:

Featured Post

Advantages and disadvantages of mother tongue-based education

Photo: Naga Smiles to the World by Shiela S. Ronquillo Del Gallego Central, Del Gallego District Since School Year (SY) 2012-2013,...