LABO: Lalaki, binadil nin 4 na beses; idinalagan sa CNPH para ipabulong

LABO, Camarines Norte 11/21/16 (Bicol Standard) – Binadil nin dae nabistong lalaki si Albert Diaz y Dasco, alyas “Kirat,” 19 anyos, na residente kan Sitio Nico, Brgy. Dalnac, Paracale, Camarines Norte, kasubagong alas 6:00 nin banggui.



Base sa report kan pulis, nakalunad sa likod kan driver kan pampasaherong tricycle si Diaz, hale sa Brgy. Talobatib pasiring sa banwaan kan Paracale.

Kan makaabot na an saiyang sinasakayan na vehiculo sa Sitio Sierra Bross, sa Brgy. Mahawan-hawan, pinara suboot an tricycle driver kan sarong lalaki, asin naglunad sa vehiculo.

Mayo nin ano man na pinagponan, basang na sanang binadil kan nakisakay na lalaki si Diaz, na tinamaan nin apat na bala sa saiyang likod.

Marikas na nagkutipas padulag an suspechado, na nabistong si Rolito Basto, na taga Brgy. Calabasa, digdi asin an saro pang kasapakat kaini.

Tulos idinalagan kan mga nagrespondeng mga miembros kan Barangay Public Safety Officer (BSPO) an victima sa Camarines Norte Provincial Hospital (CNPH) tanganing ipabulong.

An mga miembros kan pulis digdi nagpapadagos pa kan saindang imbestigasyon, asin pig hihingowa na madakop tulos an mga suspechado.

Start typing and press Enter to search