Monday, November 21, 2016

DONSOL: Miembro kan Army, tinigbas nin burat

DONSOL, Sorsogon 11/21/16 (Bicol Standard) -- Iridong idinalagan sa Bicol Regional Teaching and Training Hospital (BRTH) si PFC Christian Avir y Galicto, na suboot tinigbas nin pirang beses ni Nico Jay Avisado y Luber kasubanguing poco mas o menos alas 10:15 nin bangui.


Nangyari an incidente sa Brgy. Dancalan, digdi.

An victima, miembro kan Philippine Army, na nakadistino sa Charlie Company, na nakabase sa Brgy. Pangpang, sa banwaan na ini.

Sabi sa report, si Avir, kaibahan an saiyang mga barkada nakatindog sa guilid kan tinampo sa atubangan kan Kiyo Beach Resort kan siya tigbason kan suspechado.

An suspechado, suboot burat kan mangyari an krimen asin dali-daling nagkutipas padulag.

Mientrastanto, kasubagong ala 1:40 nin aga, an suspechado isinuko kan saiyang ama na si Carmelo Avisado y Macandog ki SPO1 Willam A. Cantonjos sa hepatura kan pulis.

Durante kan enot na rangkada kan imbestigasyon naaraman na an suspechado 29 anyos an edad, asin residente kan Brgy. Dancalan.

An sabi, pakatapos na tigbason niya si Avir, dinara ngona an victima sa Donsol District Hospital tanganing ipabulong.

Alagad, nin huli sa mga lugad sa lawas kan victima, ilinipat siya sa BRTTH, asin digdi pigbubulong ngonian.

Segun sa intrevista ki SPO1 Larry Lorente Vibar kan BICOL STANDARD, sinabi kaini na yaon pa ngonian sa sinambit na hospital an victima.
Share:

SPECIAL OFFER

SPECIAL OFFER

Featured Post

DAET GARBAGE ISSUE | Sarion blames Ochoa; Ochoa to request for state audit of funds

Former Mayor Tito Sarion (left), incumbent Mayor Benito Ochoa (right) DAET, Camarines Norte—“The ball is now in the hands of the new ...