Tuesday, November 22, 2016

Bigtime na supplier nin shabu sa Nabua, nadakop sa Oas, Albay

NAGA CITY 11/22/16 (Bicol Standard) –Guardia sa banwaan kan Nabua, Camarines Sur asin tricycle driver an dinakop kasoodma sa buy-bust operation kan pulis sa Brgy. Rizal, Oas, Albay na nagresulta sa pagka-comfiscar nin shabu na nagkakantidad P325,000.00.


Nabisto an guardia na iyo si Ronielo “Bro” Obredo y Olayvan, 50 anyos, taga Brgy. La Purisima, Nabua, Camarines Sur, mantang an tricycle driver, iyo si Reymond “Temon” Broqueza y Alfro, 36 anyos, na saro man na carpentero.

Segun sa pahayag ni Police Chief Inspector Arthur Gomez, an Information Officer kan Albay Provincial Police Office, an mga suspechado yaon ngonian sa pangangataman kan PDEA, sa Region V.

An nakuang shabu sa mga suspechado sarong small-sized asin large-sized sachets, na may gabat na 60.8134, sabi ni Gomez

Maroromdoman na kan sarong semana, saro pang residente kan Brgy. La Purisina an binadil, gadan kan dae nabistong mga suspechado, nin huli man guiraray sa illegal na droga.

An banwaan kan Nabua iyo an saro sa mga banwaan kan Camarines Sur na pigtutubudan na bagsakan nin dakulang supply kan bawal na droga.

Paghale sa Nabua, an shabu pigdidistribuir sa mga kataraid na banwaan sa Rinconada Area asin sa Provincia kan Albay.

An mga nadakop na suspechado sasangatan nin caso criminal sa pagbalga kan R.A 9165 na mas bisto sa apod na Comprehensive Dangarous Drugs Act of 2002.
Share:

Featured Post

Naga City shabu dealer slapped with life term

NAGA CITY 11/22/17 (Bicol Standard) -- A man caught selling Php200,000.00 worth of shabu inside a room of Villa Caceres Hotel in 2015 w...