Monday, October 10, 2016

Pulis timbog sa montehan, may shabu sa bulsa

RAGAY, Camarines Sur October 10, 2016 (Bicol Standard) – Orog na mahihidali para sipaon na sa trabaho bilang pulis si PO2 Daniel Ochoa kan Del Gallego Municipal Police Station na nadakop sa sugalan nin monte sa Brgy. GRS, digdi.


Afuera sa pagiging imbuelto sa ilegal na sugal, may mas magabat na caso pa siyang aatubangon, huli ta nakuahan si Ochoa nin tulong sachet nin shabu, sa saiyang bulsa.

Sa intrebista kan BICOL STANDARD ki CSur PNP Provincial Director Sr. Supt. Walfredo Pornillos, sinabi kaini base sa saindang record, sarong semana nang AWOL si Ochoa antes na mangyari an pakadakop saiya.

Afuera kan pagka-imbuelto sa droga, nadakop mismo siya sa sugalan nin monte sa nasambit na barangay kaibahan kan walong iba pa.

Pigconfirmar kan CSur PNP na dagos an inquest proceedings contra ki Ochoa, asin sa 8ng iba pa, na maatubang nin caso nin illegal gambling.

Sa parte ni Ochoa, duwang asunto kriminal an saiyang aatubangon, enot sa ilegal na paggamit nin droga asin ikaduwa, sa illegal gambling.

Pigconfirmar ni Pornillos na haloy na sindang may informasyon dapit sa mga aktibidades kan suspechado, kabale na an saiyang suboot paggamit nin droga.
Share:

SPECIAL OFFER

SPECIAL OFFER

Featured Post

Chief Supt. Gardiola assumes as Bicol top cop

LEGAZPI CITY 7/10/17 (Bicol Standard)--Police Chief Supt. Antonio N. Gardiola has been installed as the Acting Regional Director of...