Friday, October 14, 2016

Mag-ama, tumba sa illegal drug operation kan Naga City police

NAGA CITY October 14, 2016 (Bicol Standard) –Naghihibi mantang nagpapaliwanag sa reporter kan BBS-DWLV si Francia Cuarel, agom Romeo Cuarel Sr., na nabadil asin nagadan sa buy-bust operation kan pulis, digdi.


Nangyari an incidente sa Zone 3, Dona Clara Village, Concepcion Pequena, poco mas o menos alas 10:45 kasubangui.

Afuera ki Romeo Sr., nagadan pa si Romeo Saldy Cuarel y Tuazon, a.k.a Bebe, aki ni Romeo Sr., sa pareyong operasyon.

Sabi sa pahayag sa media ni Francia, agom ni Romeo, nagdalagan siya sa lugar kan incidente na pirang metros sana an distancia sa saiyang kinakamugtakan kan makadangog nin putok nin badil

Alagad, suboot pirit siyang itinuklang parayo sa lugar kan mga pulis.

Pig confirmar ni Francia na si Romeo Sr., iyo an saiyang agom, pero pirang taon nang suway na sinda.

Ako pa ni Francia na imbuelto manangad si Romeo Sr., sa illegal na droga. Mala ngani, ta kan naka aging bulan nagpasiring na sa City Hall tanganing voluntad na nagpalista asin nangako na mabagong buhay na.

Mientrastanto, nag sisiloksigok na ini kaibahan an saro pa niyang aking si Grace an nagsabi na si Romeo Saldy Cuarel nakadamay sana sa saiyang ama, na nagadan man.

An mga victima nagsapo nin mga tama nin bala sa man-laen-laen na parte kan saindang mga lawas na iyong naging kawsa kan saindang kagadanan.

Base sa intelligence report, an harong ni Romeo Sr., haloy nang pignapasadahan asin pinapatanidan kan mga awtoridad huli ta ginagamit na lugar kan mga nag titira nin shabu.

Naheling laog kan saiyang residencia an mga nagwarak na ginamit nang alluminum foil asin iba pang mga bukas nang plastic sachet, na bugtakan kan ipig babawal na bulong.

An mga pulis na iyong naglansar kan buy-bust naghapahag na lehitimo an saindang operasyon. (Report hale ki Ronron Enon)
Share:

Featured Post

Naga City shabu dealer slapped with life term

NAGA CITY 11/22/17 (Bicol Standard) -- A man caught selling Php200,000.00 worth of shabu inside a room of Villa Caceres Hotel in 2015 w...