Tuesday, October 4, 2016

Iriga City 'drug queen,' mga menor de edad, dakop sa raid

IRIGA CITY October 4, 2016 (Bicol Standard) – Pigservehan nin Search Warrant kan mga pulis kasoodma (October 3), alas 4:00 nin aga, si Rosa Dize y Ebron, 44, No. 4 sa drug list digdi.


Kabale sa mga pangaran na suboot kasapakat niya iyo si Shabina Enrica Lacap, 21 anyos; Michael Olea, 26, asin duwang menor de edad. An saro sa mga pinangaranan sa Search Warrant, 17 anyos, asin an saro, 15 anyos. Anas sinda taga Brgy. San Francisco, asin sarong 17 anyos na daraga na residente kan Z-1, Brgy. San Juan, gabos sa Ciudad na ini.

Firmado an Search Warrant ni Judge Salve Eva Q. Villareal-Dimabayao kan RTC, Iriga City.

Mientrastanto, durante kan implementasyon kan search warrant, anom na personas an yaon sa laog kan sinambit na lugar na sabi kan mga imbestigador ginagamit na “drug den.”

Sinda iyo an minasunod: Maricel Ramboyong, 24, asin sarong 13 anyos na aking lalaki, pareyo taga Brgy. La Trinidad; John Lacap, 20 anyos, asin sarong 17 anyos na daraga, na pareyo taga Brgy. San Francisco; Roberto Lucena, 20, taga Brgy. San Jose, gabos sa ciudad na ini; asin si Jonathan Baita, 19 anyos, na residente kan San Juan, Baao, Camarines Sur.

Durante kan ginibong body search ki Baita, nakua sa saiyang hawak an sarong plastic sachet na may laog nin shabu.

Sabi sa report, sa ginibong paghaloghog kan residencia kan suspechado, nakakua an mga pulis nin 5ng small transparent plastic sachet na may laog nin shabu, 1ng medium plastic sachet na may laog man guiraray nin shabu, 4 na plastic sachet na may laog nin mga alang na dahon nin marijuana asin iba pang mga drug paraphernalia.

Nakakua pa an mga awtoridad nin cash na kantidad P955.00, sarong hand grenade asin saro man na digital weighing scale.

An gabos na nasambit na tawo sa operasyon kan pulis, kabale an mga evidencia an dinara sa Iriga City Police Station para sa magkakanigong disposisyon.

Sa oras na sinusurat an baretang ini, nag-oorolay sa Provincial Command an Chief of Police kan Iriga City na si Supt. Alex Pederio asin si Provincial Director PSSupt. Walfredo Pornillos.

May informasyon na may isinumbong na mga pangaran nin mga darakulang tawo na may partisipasyon sa illegal drug trade sa Rinconada area.
Share:

Featured Post

Celebrating creation: Guibo Mi Yan pop-up art fair in Naga City

Guibo Mi Yan pop-up art fair in Naga City by Melissa Villa-Real Basmayor The declaration of the name of the pop-up art fair Guibo Mi...