Familia kan 2ng nagadan sa buy-bust masumbong sa CHR

NAGA CITY October 15, 2016 (Bicol Standard) –Masumbong sa Commission on Human Rights (CHR) si Grace Caurel, aki, asin tugang kan 2ng kan lalaking nagadan sa operasyon kan pulis sa Concepcion Pequena, contra sa ipinapangalad na droga, digdi kan sarong banggui.


Ipinahayag niniya na mayong badil an saiyang amang si Romeo Caurel Sr., asin siring man si Romeo Caurel Jr., kan sinda baradilon kan mga awtoridad na nagconducir nin buy-bust operation sa residencia kan mga victima.

Nagsabi pa siya na sinda duwa kan saiyang ina an nagprobar na magsaklolo sa mga victima, kan madangog an purok-putok nin badil sa sarindang residencia.

Alagad, sabi pa saiyang declarasyon, itinuklang sinda asin dae tinugotan na makarani tanganing ma-agapan na dae mabadil an saiyang tugang asin ama.

Mientrastanto, nangingiriil an nagrereklamo na mayong badil an saiyang tugang na si Romeo Jr., asin mayo man nin siring na armas an saiyang ama.

Sa ibong na lado, inako niya na dati nang nagsuko sa City Hall an saiyang magurang huli sa maisog na kampanya kan gobierno contra sa ipinapangalad na bulong.

Ako man ninda na na-imbuelto mananggad sa caso nin pagsalakat an saiyang tugang. Pero, dae siya naggagamit nin droga.

Pigkwestyon pa kan nagrereklamo kun tano ta suboot tuyong pinadulag kan mga awtoridad an sarong may gahang “Toks,” na kaibahan kan saiyang ama na pinadapa, mantang ginigibo si saindang operasyon.

An mga pulis sa ibong na lado nagpasabot na preparado sindang hampangon an ano man na reklamo na ibibiklad kan familiang Caurel, maski pa ini isangat sa CHR.

Hastang sinusurat an baretang ini, mayo pa man nin nakipagcoordinar sa Commission on Human Rights digdi papadapit sa nasambit na reklamo.

Sa parte kan mga pulis, malinaw na pugol ninda an mga evidencia na mapatuyan na legitimo si saindang operasyon.

An mga nakaheling sa lugar na pinangyarihan kan incidente nagsasabi na regular talagang ginagamit an residencia kan victima kan mga adik sa shabu sa lugar na ini.

Start typing and press Enter to search