Daragang taga Lagonoy, tinaga nin burat

LAGONOY, Camarines Sur October 3, 2016 (Bicol Standard)- An binino kan arak iyo an naging mitsa sa aksidenteng pagkataga ki Carol Lambit y Narvato, 20, na residente kan Brgy San Ramon, digdi.



An mga imbestigador nagsabi na an victima nagprobar na defensahan an saiyang ama na si Efren Lambit Jr., na iyo si tuyong tigbason kan suspechadong si Mark Anthony Hallarda y Penero.

Base sa sumbong kan victima, kan October 1 (Sabado), alas 9:30 nin aga, papule siya sa saindang harong sa San Ramon, nasunundan niya sinda Hernio Penero y Baturiano, Mark Anthony Hallarda y Penero asin an saiyang ama na si Efren, na risang nakatumar nin alak.

Pirang minutos an naka-agi, nadangog niya si Mark Anthony asin si Henio na nagdidiskusyon, mantang an saiyang ama na si Efren Jr. an nagsasaway sainda.

Nagpuli sa saindang harong si Mark Anthony asin liwat naheling kan victima na may darang sundang.

Sabi kan victima an kalaban ni Mark Anthony iyo an saiyang ama, na kan oras na ito, nakatukaw sa sarong kubo kataid kan saindang harong.

Mayo suboot nin ano man na rason basang na sanang tinigbas ni Mark Anthony an saiyang ama.

Alagad, imbes na tamaan si Efren Jr., an sinakob kan tigbas iyo an victima.

Idinagdag sa report na tinamaan kan sundang kan suspechadong si Mark Anthony an walang takyag kan victima.

Huli kaini, idinalagan siya sa Bicol Medical Center sa Ciudad kan Naga, asin nagpapaomay ngonian kan saiyang lugad.

Tulos inarestar kan mga awtoridad an suspechado sa paagui kan mga nag respondeng mga tanod.

Pighahanda na an kasong isasangat contra sa suspechado.

An victima salbado sa katibaadan huli kan lugad na saiyang sinapo.

Start typing and press Enter to search